خیبرپختونخواهده پولیس پُستهسیگه هجوم قیلیندی. هجومده کمیده۱۵جان بېرگن و۳ کیشی یرهلنگن.
پاکستان یېتکرمهلریگه کۉره، هجوم تیناوون شنبه،۱۹- ثور بنو اولسواللیگی « فتحخیل» پولیس پُستهسیگه عملگه آشیریلگن.
دان کوندهلیگی خبریگه کۉره، هجوم «ترورچیلر» تامانیدن پارتلاوچی مادّهلر بیلن تۉلدیریلگن موترنی پُسته بناسیگه اوریب کیریشدن باشلنگن، سۉنگره اۉق آتیش و جنگاور تۉقنهشوو یوز بېرگن.
بنو پولیس رسمیسی سجادخان نینگ ایتیشیچه، هجوم پیتیده پُستهده۱۸نفر پولیس خادیمی بۉلگن، اولردن۱۵ نفری هلاک بۉلگن،۳ نفری اېسه یرهلنگن.
«دان»نینگ یازیشیچه، هجومدن کېین پولیس پُسته بناسی تۉلیق ویران بۉلگن، قۉشنی بنالرگه هم ضرر یېتگن.
قوتقروو ایشلری تانگگه قدَر دوام اېتگن و ویرانهلر آستیدن جسدلر همده یرهدارلر چیقریب آلینگنیدن سۉنگ یکونلنگن.
بنو اولسواللیگینینگ اداری بیر رسمیسینینگ فرانسه خبر گزارلیگیگه ایتیشیچه، هجومچیلر درونلر و آغیر قوراللردن هم فایدهلنگنینی ایتگن، اما بو دعوا مستقل تصدیقلنمهگن.
هجوم اوچون « اتحادالمجاهدین» ناملی گروه جوابگرلیکنی اۉز ذمّهسیگه آلگن.
پاکستاننینگ خیبرپختونخواه ایالتی سۉنگگی ییللرده قوراللی هجوملر و زۉرآورلیکلر کېسکین آشگن منطقهلردن بیری بۉلیب قالماقده.
پاکستان رسميلری اکثر هجوملرنی تحریک طالبان پاکستان بیلن باغلهیدی و اولرنی افغانستان توپراغیدن فایدهلنیشده عیبلهیدی.
افغانستاندهگی طالبلر اېسه بو عیبلاولرنی رد اېتیب، هېچ بیر گروهگه اۉز توپراغیدن باشقه دولتلرگه قرشی فایدهلنیشگه رخصت بېرمسلیگینی بیلدیرهدی.
