محلي منبعلر بدخشانده طالبان بیلن باغلیق قوراللی شخصلر و محلي اهالی اۉرتهسیدهگی تۉقنهشوو عاقبتیده کمیده ایکّی کیشی هلاک بۉلگنی، ینه بیر نېچه کیشی یرهلنگنینی بیلدیرماقده.
منبعلرگه کۉره، اوشبو تۉقنهشوو تیناوون شنبه،۱۹-ثور ولایتنینگ شکي اولسواللیگی «شیرین نظم» قیشلاغیده آلتین کانینی قزیب آلیش مسألهسی یوزهسیدن باشلنگن. ماجرا طالبانگه علاقهدار محلي قوماندانلر «عبدالفتاح» و «موسی کاکر»گه قرهشلی قوراللنگن شخصلر بیلن قیشلاق اهالیسی اۉرتهسیده یوز بېرگن.
ایتیلیشیچه، اوشبو قوماندانلرنینگ آدملری قیشلاققه کیریب، اهالینینگ کان قزیش اسکونهلرینی ویران قیلگن و اولرنی کلتکلهگن. اهالینینگ قرشیلیک کۉرسهتیشی آرتیدن قوراللی تۉقنهشوو باشلنگن.
منبعلر دستلب تۉرت کیشی یرهلنگنی حقیده خبر بېرگن اېدی. کېینراق اېسه ایکّی کیشی هلاک بۉلگنی و کمیده 15 کیشی یرهلنگنی معلوم قیلیندی.
منبعلرنینگ ایتیشیچه، «عبدالفتاح» زابل ولایتیدهگی طالبان والیسی اۉرینباسری جمعه فاتح نینگ اوکهسی بۉلیب، «موسی کاکر» بیلن بیرگه «مسوولیتسیز قوراللی شخصلر» حسابلنهدی و طالبان ادارهسیگه رسمي لوازمگه اېگه اېمس.
شونینگدېک، بو قوراللی شخصلر محلي اهالینی عامهوي روشده حبسگه آلیشنی باشلهگنی و حاضرگچه قریب 15 کیشینی قۉلگه آلگنی ایتیلماقده.
«اطلاعات روز» گزیتهسی اوشبو تۉقنهشوو قربانلری سانینی مستقل روشده تصدیقلهی آلمهگن.
بدخشاندهگی طالباننینگ محلي رسميلری حاضرچه بو واقعه یوزهسیدن ایضاح بېرمهگن.
مذکور تۉقنهشوو سۉنگگی ایکّی کون ایچیده بدخشاننینگ ارگو تومنیدهگی «آتن جلو» قیشلاغی اهالیسی هم کۉکناری دلهلرینی یۉق قیلیش مسألهسیده طالبان بیلن تۉقنهشگن بیر پیتده یوز بېرماقده. اۉشه واقعهده هم کمیده ایکّی محلي اهالی هلاک بۉلگن و بیر نېچه کیشی یرهلنگن اېدی.
افغانستان شِمالی-شرقیدهگی بدخشان ولایتی سۉنگّی ییللرده کان قزیش ایشلری و کۉکناری دلهلرینی یۉق قیلیش مسألهلری یوزهسیدن محلي اهالی همده طالبان کوچلری اۉرتهسیدهگی تکراري تۉقنهشوولرگه صحنه بۉلیب کېلماقده.
محلي اهالی طالباننی کمسیتووچی و «تحقیرلاوچی» مناسبتده عیبلهماقده. شونینگدېک، اولر اوشبو گروهنینگ کانلرنی قزیب آلیش ایشلری ولایت محیطیگه ضرر یېتکزهیاتگنینی تأکیدلهماقده.
