پاکستان تشقی ایشلر وزیرلیگی کنر ولایتی و باجور اولسواللیگی قبیله آقسقاللری، شونینگدېک نورستان ولایتی و چترال آقسقاللری اۉرتهسیده طالبان و پاکستان اۉرتهسیدهگی اوروشنی تۉختهتیش همده تینچلیک اۉرنهتیش یوزهسیدن اېریشیلگن کېلیشوولرنی آلقیشلهدی.
طاهر اندرابي بوگون (پنجشنبه،۱۷-ثور) اۉتکزیلگن مطبوعات انجمنیده بو کېلیشوولر چېگرهنینگ ایکّی تامانیدهگی خلق تینچلیک ایستهیاتگنینی کۉرسهتیشینی ایتدی. بیراق او افغانستان ایچیده تینچلیککه قرشی بۉلگن عنصرلر فعال اېکنینی و اولر «پاکستانگه قرشی تروریستیک هجوملرنی قۉزغهتیش، رېجهلشتیریش و تشکیل اېتیش بیلن شغللنهیاتگنینی» تأکیدلهدی.
او افغانستان و پاکستان مناسبتلری نینگ کېلهجگی حقیدهگی سوالگه جوابن شوندهی دېدی: «شو سببلی سوال توغیلهدی: طالبان نینگ حکمران ادارهسی بو تروریستیک عنصرلرنی نظارت قیلیش، ضررسیزلنتیریش و جلولشگه قَی درجهده قادر؟ بو عنصرلر افغانستان حدودیده تۉلیق دخلسیزلیک بیلن فعالیت یوریتماقده و اَیریم حاللرده محلي حاکمیتلر، جملهدن طالبان رېجیمینینگ اۉزی بیلن همکارلیک و اتفاقده حرکت قیلماقده.»
پاکستان تشقی ایشلر وزیرلیگی مطبوعات سۉزلاوچیشی ینه شوندهی دېدی: «خلقارا گزارشلر هم افغانستانده بو تروریستیک عنصرلر اوچون خوفسیز محیط و فعالیت یوریتیش امکانیتی موجودلیگینی تصدیقلهگن. دېمک، برچه مسأله عیناً شو معماگه باریب تقهلهدی.»
اندرابي شوندهی دېدی: «پاکستان و افغانستان، همده ایکّی مملکت خلقلری اۉرتهسیده کتّه کېلیشماوچیلیک یاکه ضدیت یۉق. بیزنینگ دینیمیز، قبیلهوي ایلدیزلریمیز، اېتنیک اساسلریمیز و تینچلیککه بۉلگن آرزولریمیز عمومي. اما عیناً منه شو تروریزم مسألهسی پاکستانگه تأثیر قیلهیاتگن و افغانستان حدودیدن کېلیب چیقهیاتگن تهدید مناسبتلریمیزنی تۉختهتیب قۉیدی. طالبان رژیمی کابلده بو وضعیت نینگ جدّيلیگینی توشونیب یېتمهگونچه و اونینگ آلدینی آلمهگونچه، بو معما مناسبتلریمیزگه تۉسقینلیک قیلیشده دوام اېتهدی.»
او دوام اېتیب دېدی: «کابل افغانستان توپراغیدن پاکستانگه قرشی عملگه آشیریلهیاتگن هر قندهی تروریستیک فعالیتگه نسبتاً مطلق مُراضاتسیزلیک سیاستی بۉلیشی کېرهکلیگینی توشونیشی مهمدیر. طالبان رژیمی شو توشونچهنی اۉز سیاستیگه سینگدیریب، پاکستانگه افغانستان توپراغیدن فایدهلنیلمسلیگی حقیده قطعي و یازمه کفالتلر بېرگنیدن کېین، باشقه مسألهلر، چېگره یاپیلیشی، ویزه معمالری، سودا تۉسیقلری و باشقهلر انچه آسان حل بۉلهدی.»
کنر ولایتی آقسقاللری و باجور اولسواللیگی قبیله یېتکچیلری شو هفته سهشنبه کونی طالبان و پاکستان اۉرتهسیدهگی اۉت آچیشنی تۉختهتیش بۉییچه کېلیشووگه اېریشگن اېدی.
اولر نینگ کېلیشوویگه کۉره، طالبان و پاکستان عسکرلری اوّلگی موضعلریگه قَیتیشی و «بیر-بیریگه تجاوز قیلیش حقوقیگه اېگه اېمسلیگی» بېلگیلنگن.
شونینگدېک، اگر باجور و مهمند حدودلریدن کنرگه هجوم قیلینسه، بونگه پاکستان حکومتی مسوول بۉلیشی، اگر کنردن اوشبو ایکّی حدودگه هجوم قیلینسه، بونگه طالبان جوابگر بۉلیشی حقیده هم کېلیشیلگن.
بوندن اوّل هم چیترال و نورستان ولایتی آقسقاللری چېگرهدهگی حدودلرده طالبان و پاکستان اۉرتهسیدهگی اۉت آچیشنی تۉختهتیش بۉییچه کېلیشووگه اېریشگن اېدی. شوندن سۉنگ پاکستان تامانیدن یاپیلگن نورستان نینگ اَیریم یۉللری قَیته آچیلگن.
طالبان و پاکستان اۉرتهسیدهگی تۉقنهشوولر ایکّی آیدن آرتیق دوام اېتماقده. تورلی دولتلرنینگ واسطهچیلیک اورینیشلریگه قرهمهی، تامانلر حلی هم ماجرانی توگهتیش بۉییچه کېلیشووگه اېریشه آلمهگن.
بوندن تشقری، اۉتگن ییلگی تۉقنهشوولر سببلی افغانستان و پاکستان اۉرتهسیدهگی سودا، ترانزیت و قوروقلیک آرقهلی قتناو قریب سکّیز آیدن بېری تۉختهب قالگن و چېگرهلر یاپیق توریبدی.
پاکستان تحرک طالبان پاکستان کبی تروریستیک گروهلر افغانستان توپراغیدن پاکستانگه قرشی فایدهلنهیاتگنینی دعوا قیلهدی. بیراق طالبان بو عیبلاولرنی رد اېتیب، پاکستاندهگی خوفسیزلیک معمالرینی اۉشه مملکت خوفسیزلیک ادارهلری نینگ عاجزلیگی بیلن ایضاحلهماقده.
