بدخشان ولایتیدهگی محلي منبعلر نامعلوم قوراللی شخصلر اوشبو ولایتنینگ اشکاشم اولسواللیگیده بیر عیالنی اۉلدیرگنینی اَیتماقده.
منبعلرگه کۉره، بو عیال نینگ اسمی «لیلما» بۉلیب، بوگون اېرتهلب (پنجشنبه، ۱۷ثور) چمهسی ساعت۸:۰۰ اطرافیده اشکاشم بازاریده هجومگه اوچرهگن.
منبعلرنینگ ایتیشیچه، لیلما بدهخشاندهگی اسماعیلي شیعهلردن بۉلگن و سلام مفتوننینگ تورموش اۉرتاغی اېدی.
معلوماتلرگه کۉره، او اشکاشیمدهگی عیاللر اوچون مخصوص بازارده تیکووچیلیک اوستاخانهسیگه اېگه بۉلگن و ایش جاییگه کېتهیاتگن پیتده هجومگه اوچرهگن.
منبعلرنینگ بیلدیریشیچه، او اوّل یرهلنگن، کېین اېسه شفاخانهگه آلیب باریلگچ وفات اېتگن.
طالبلرنینگ بدخشان ولایتیده امنیه قوماندانلیگی سۉزلاوچیسی احسانالله کامگار، اوشبو قاتللیکنی تصدیقلب، حادثه یوزهسیدن تېرگاو باشلنگنینی معلوم قیلگن.
حاضرگچه اوشبو قاتللیکنی صادر اېتگن شخصلر و اونینگ سببی انیقلنمهگن.
طالبان افغانستاننی قَیته اېگهلهگنیدن بویان اسماعیلی شیعهلر کوچلی باسیم آستیده قالماقده و بیر نېچه بار نامعلوم قوراللی شخصلر هجومیگه اوچرهگن.
بیرلشگن ملتلر تشکیلاتی گزارشیگه کۉره، طالبان اَیریم اسماعیلي شیعهلرنی مجبورن مذهبینی اۉزگرتیریشگه اوندهگن همده اوشبو دیني جماعه اعضالرینی بیر نېچه بار حبسگه آلیب، قماققه تشلهگن.
