افغانستاندن بۉلگن بالهلر تعلیمی فعالی مطیعالله ویسا، فرانسهنینگ نورماندی منطقهسیدهگی «آزادلیک» مکافاتی ساورنداری دېب اعلان قیلیندی.
نورماندی منطقوي کېنگشی سهشنبه کونی (۱۵ثور) بېرگن بیاناتیده اوشبو مکافات ویسا تامانیدن بالهلرنینگ تعلیم آلیش حقوقینی کېنگهیتیریش، اینیقسه افغانستانده قیزلر تعلیمینی قۉللب-قوّتلش بارهسیدهگی سعی-حرکتلری اوچون بېریلهیاتگنینی معلوم قیلدی.
حکملر هیئتی باشلیغی هاجا ادریسابا ویسا فعالیتینی یوقاری بهالب شوندهی دېدی: «اونینگ فداییلیگی یاش اولاد قدرتی نینگ رمزی دیر. آزادلیگیمیز، بیزنینگ آوازیمیزدیر و بیز قیزلر تعلیمی حقوقینی حمایه قیلیشیمیز کېرهک.»
کېنگش بیاناتیده قید اېتیلیشیچه، مکافاتنینگ سکّیزینچی باسقیچیده۷۵دولتدن قریب۱۹ مینگ نفر یاش آنلاین طرزده ویسا اوچون آواز بېرگن.
میلادی ۲۰۱۹- ییل «فرانسه صلح و انسان حقوقلری خلق ارا انستیتوتی» همکارلیگی بیلن ایجاد بۉلگن «آزادلیک» جایزهسی، هر ییلی آزادلیک همده انسان حقوقلری بۉییچه کورهشگن کیشیلرگه تاپشیریلهدی.
جاري ییلده ویسادن تشقری اکوادوردن بۉلگن اطراف-محیط فعالی و چیندهگی اېرکینلیک کوزهتووچیسی هم اوشبو مکافاتگه نامزاد بۉلگن. مکافات کېلهسی آی رسمي مراسمده ویساگه تاپشیریلیشی رېجهلشتیریلگن.
۳۴ یاشلی مطیع الله ویسا افغانستان جَنوبیدهگی قندهار ولایتیده توغیلگن. او۱۷یاشیده «راه قلم» ناملی تشبثنی یۉلگه قۉییب، مملکتنینگ جَنوب و شرق حدودلریده بالهلر تعلیمینی قۉللب-قوّتلش ایشلرینی باشلهگن.
بوگونگی کونگه قدَر قریب 3 مینگ کۉنگیللی اوشبو تشبثگه قۉشیلگن بۉلیب، اولر قیشلاقمه-قیشلاق یوریب، محلي اهالی بیلن بېواسطه صحبتلر آرقهلی آته-آنهلرنی فرزندلرینی مکتبگه یوباریشگه اوندهب کېلماقده.
ویسا اوشبو فعالیتی سبب ۱۴۰۲-ییل ۷-حمل کونی طالبان استخباراتی تامانیدن حبسگه آلینگن و قریب یېتّی آی دوامیده محکمهسیز قماقده سقلنگن.
او اۉتگن ییل قوس آییده بالهلر تعلیمینی قۉللب-قوّتلش یۉلیدهگی خدمتلری اوچون قطر حکومتی تامانیدن تاپشیریلهدیگن شیخ تمیم بن حمد آل ثانی خلق ارا مکافاتینی قازانگن اېدی.
