طالبلر مسووللرینینگ حقارتیدن سۉنگ، ننگرهارده اۉتکزیلگن «گُل نارنج» مشاعره دستوریده قتنهشگن خبرچیلر تدبیرنی ترک اېتگنلر.
اوشبو دستور تیناوون (دوشنبه، ۱۴-ثور) جلال آباد شهریده، طالبلرنینگ اخبارات و مدنیت ادارهسی مېزبانلیگیده اۉتکزیلگن اېدی.
تدبیرده قتنهشگن خبرچیلرنینگ ایتیشیچه، طالبلر اخبارات و مدنیت وزیرلیگینینگ ترانهلر بۉلیمی مسوولی «صحنه اوستیگه میکروفونلر اۉرنهتیلگنی» سبب خبرچیلرگه نسبتاً حقارتلی سۉزلر ایشلهتگن.
بیر خبرچینینگ سۉزلریگه کۉره، اوشبو رسمی اولرگه: «سیزلر عموماً آدم بالهسی اېمسسیزلر» و «جاسوسسیزلر»، دېب حقارت قیلگن.
اونینگ ایتیشیچه، خبرچیلر بو حقارتگه ناراضیلیک صفتیده تدبیرنی ترک اېتیب، اونی یاریتیشدن باش تارتگن.
«گُل نارنج میله و مشاعرهسی» عنعنوي طرزده هر ییلی بهار فصلینینگ باشیده ننگرهارده اۉتکزیلهدی.
بو ییل دستور ۲۰-حمل کونی اۉتکزیلیشی رېجهلشتیریلگن اېدی، بیراق طالباننینگ اخبارات و مدنیت ادارهسی اونی کېینگه قالدیرگنینی اعلان قیلگن.
اۉشه پیتده منبعلر «اطلاعات روزگه»گه طالبان بو قرارنی پاکستاندن احتمالي هجوملر خواطری سبب قبول قیلگنینی بیلدیرگن.
مذکور دستور اۉتگن ییل هم بحث-مناظرهلرگه سبب بۉلگن اېدی. اۉشه ییلی پشتو تیلینینگ تنیقلی شاعری مطیعالله تراب اوشبو تدبیرده طالبلرنینگ قیزلر تعلیمینی تعقیقلش سیاستینی تنقید قیلیب، مکتبلرنی قَیته آچیشنی طلب قیلگن.
اونینگ تنقیدي چیقیشی طالبلرنینگ کېسکین عکسالعملیگه سبب بۉلگن و آرتیدن ننگرهار سابق اخبارات و مدنیت رهبری ساجد خوگيانی لوازمیدن چېتلهتیلگن. شونینگدېک، طالبان «مشاعرهلرنی ترتیبگه سالیش تۉغریسیده قانون»نی ایشلب چیقیب، تصدیقلهگن. اوشبو حجتده مشاعرهلرده هبتالله آخوندزادهنینگ فرمانلری، کۉرسهتمهلری و قرارلرینی تنقید قیلیشدن تيیلیش، شونینگدېک شعرلر «قیزلر و اۉغیل بالهلرنی دۉستلیک و مجازی سېوگیگه اوندهشدن خالی بۉلیشی» کېرهکلیگی بېلگیلنگن.
