افغانستانلیک تنیقلی صنعتکارلردن بیری محمد صابر کارگر صنعت فعالیتینینگ ۵۰ییللیگی استانبولده اۉتکزیلگن مخصوص «قدرلش کېچهسی» آرقهلی نشانلندی.
تدبیر اوراسیا تورک اویوشمهلری فدراسیونی تامانیدن تشکیل اېتیلیب، ۲-می کونی فاتح علی امیری مدنیت مرکزیده بۉلیب اۉتدی.
تدبیرده صابر کارگرنینگ حیاتی، تورک دنیاسی موسیقيسیگه قۉشگن حصهسی همده تورک دنیاسینینگ بیرلیک و بیردملیگیده اونینگ قۉشیقلرینینگ رولی اطرافلیچه محاکمه قیلیندی.
کېچه دوامیده صنعتکارنینگ یقین دۉستلری بنیامین آق سونگور ، مقام خوان یوسف آلپر همده سردار محمدعلی یوف صحنهگه چیقیب، کارگرنینگ قۉشیقلرینی اجرا اېتدیلر. شونینگدېک، «صابر کارگرنینگ صنعت یۉلی» ناملی حجتلی فیلمی هم نمایش اېتیلدی.
صنعتگه قۉشگن کتّه حصهسی اوچون تورکسی تامانیدن کارگر «یوقاری خدمت مدالی» بیلن تقدیرلندی. تدبیرده افغانستان تورکلری، قیرغیزلر و اویغور، اۉزبېکستانلیکلر تمانیدن ساوغهلر تاپشیریلدی.
کېچهنینگ اېنگ تأثیرلی لحظهلریدن بیری- آنه یورت مارشینینگ برچه اشتراکچیلر تامانیدن بیرگهلیکده کویلنیشی بۉلدی.
اشتراکچیلرگه صابر کارگرنینگ آلبوملری همده قوشیقلری یازیلگن خاطره کتابی هم ترقهتیلدی.
2019-ییلده اۉتکزیلگن تورک دولتلری کېنگشیده دولت رهبرلری حضوریده اجرا اېتیلگن «آنهیورت مارشی» صنعتکارنینگ تورک بیرلیگی غایهسینی افادهلاوچی مهم اثرلریدن بیری حسابلنهدی.
کارگر اۉزینینگ «تورکستان خلق موسیقهسی» «یسوي وصیتی»، و «اتا تورککه شکران» البوملری آرقهلی احمدیسوي، علیشېر نوايی و بابر کبی اولوغ ذاتلرنینگ میراثینی کېنگ ترغیب قیلیب کېلماقده.
