طالبلر سۉزلاوچینینگ اۉرین باسری حمدالله فطرتنینگ ایتیشیچه، پاکستاننینگ کنر ولایتی دانگام اولسواللیگیگه قیلگن سۉنگگی هجوملریده کمیده 3 کیشی هلاک بۉلگن، ینه ۱۴ کیشی یرهلنگن، اولرنینگ اکثریتی عیاللر و بالهلردیر.
فطرت بوگون (دوشنبه، ۱۴ثور) نشر قیلگن بیاناتیده، هجوملر چاغیده تینچ اهالیگه تېگیشلی اویلر، مسجدلر، مکتبلر و بیر طبیات مرکزی نشانگه آلینگنینی بیلدیرگن.
اونینگ قۉشیمچه قیلیشیچه، هجوملر عاقبتیده۲ته مکتب،۲ ته مسجد و۱ ته ساغلیقنی سقلش مرکزی ویران بۉلگن، شونینگدېک۸۰ باش چاروا ماللری هم نابود بۉلگن.
سۉنگگی بیر هفته ایچیده افغانستان شرقیدهگی کنر ولایتی پاکستان تامانیدن بیر نېچه بار راکت و هوا هجوملریگه اوچرهدی. اۉتگن هفتهنینگ دوشنبه کونی پاکستاننینگ هجوملری نتیجهسیده کنر بیلیم یورتی همده دانگام، منوری، شلتن و سرکانو اولسواللیکلریده کمیده۷ کیشی هلاک بۉلگن و۹۰دن آرتیق کیشی یرهلنگن اېدی.
طالبلر اوشبو هجوملرگه ناراضیلیک صفتیده کابلدهگی پاکستان اېلچیخانهسینینگ اېلچیسینی چقیرتیریب، رسمي اعتراضینی بیلدیرگن. بیراق پاکستان تشقی ایشلر وزیرلیگی بو هجوملر افغانستان حدودیدن عملگه آشیریلهیاتگن «مقصدسیز هجوملر» همده «هندستان تامانیدن قۉللب-قوّتلنهیاتگن کوچلر»گه جوابن اۉتکزیلگنینی معلوم قیلگن.
