جهان آزیق-آوقت دستورینینگ معلوم قیلیشیچه، هرمز بۉغازی نینگ یاپیلیشی سبب افغانستانگه آزیق-آوقت یاردمینی یېتکزیش خرجتلری اوچ برابرگه آشگن، یېتکزیب بېریش مدتی اېسه تخمیناً اوچ هفتهگه اوزهیگن.
جهان آزیق- آوقت دستورینینگ افغانستاندهگی مسوولی جان آیلیف «گاردین» کوندهلیگیگه بېرگن صحبتیده، حاضرده باییتیلگن بیسکوتلرنی افغانستانگه عادتدهگی دېنگیز یۉلی اۉرنیگه قوروقلیک آرقهلی، یېتّی دولتدن اۉتیب یېتکزیلهیاتگنینی ایتگن.
اونینگ سۉزلریگه کۉره: «افغان بالهلری بوگون بو وضعیت سبب آچ قالماقده و کۉپچیلیگی حیاتینی هم یۉقاتیشی ممکن.»
«گاردین» خبریگه کۉره، انسانپرورلیک تشکیلاتلر ایران اطرافیدهگی اوروش و هرمز بۉغازیدهگی بحران طفیلی نفت نرخینینگ اۉزگریشی یاردم یېتکزیش جریانینی سېکینلشتیرگنینی، بعضاً اېسه تۉختهتیب قۉیگنینی بیلدیرگن.
خلقارا قوتقروو کمیتهسی فوق العاده ایشلر بۉییچه اۉرینباسری باب کیچننینگ تأکیدلشیچه، حیاتي دارو-درمانلر مرکزلردن چیقمهیپتی و ترانسپورتدهگی اوزیلیشلر سبب تشکیلات دبیده قالیب کېتگن۱۳۰ مینگ دالرلیک یوکیگه هم کیره آلمهیپتی.
اونینگ ایتیشیچه، نیجریه و اتیوپیاده یاقیلغی تقچیللیگی کلینیکلرده جنراتورلردن فایدهلنیشنی هم چېکلب قۉیگن، حتا اَیریم شفاخانهلرده الکتر اوزیلیش خوفی موجود.
گزارشلرده قید اېتیلیشیچه، امریکا و اسرایل اۉرتهسیدهگی اوروش جریانیده نفت نرخی۶۰ دالردن۱۲۰ دالرگچه کۉتریلگن و بو گلوبل یاردم تیزیمیگه کوچلی باسیم اۉتکزگن.
بالهلرنی حمایت قیلیش تشکیلاتی حساب-کتابیگه کۉره، نفت نرخی نینگ هر۵ دالرگه آشیشی هر آیده ترانسپورت و لاگیستیکه خرجتلریگه۳۴۰ مینگ دالر قۉشیمچه یوک توشیرهدی، بو اېسه قریب۴۰ مینگ بالهگه بیر آیلیک یاردمگه تېنگ.
تشکیلات نمایندهلری نفت۲۰۲۶ییل دوامیده یوقاری درجهده قالسه، قۉشیمچه۲۷ میلیون دالر خرجت یوزهگه کېلیشینی ایتگن.
جهان آزیق آوقت دستورینینگ آگاهلنتیریشیچه، بو اوزیلیشلر نتیجهسیده ینه۴۵ میلیون کیشی آچلیک خوفی آستیده قالیشی ممکن. بوندن تشقری، الّهقچان۳۱۸ میلیون آدم آزیق-آوقت خوفسیزلیگیدن اذیت چېکماقده.
تشکیلات وکیللری «گاردین»گه بېرگن بیاناتیده، نرخلرنینگ آشیشی کېلگوسی آیلرده تخمیناً۱.۵ میلیون کیشیگه یاردم یېتکزیشنی امکانسیز قیلیب قۉییشی ممکنلیگینی بیلدیرگن.
کوندهلیکنینگ یازیشیچه، معما فقط هرمز بۉغازیدن اۉتووچی کېمهلر بیلن چېکلنمهگن، منطقهدهگی عمومي دېنگیز ترانسپورتی هم آرتیقچه یوک و خوف طفیلی سېکینلشگن.
شو سبب، اَیریم یوکلر هندستاندن جۉنهتیلیب، ایلگری عادتي یۉل بیلن عمان، بابالمندب جده آرقهلی سودن پورتیگه یېتکزیلردی. اېندیلیکده اېسه خوف و تیربندلیک سبب افریقا جَنوبیدهگی «دماغه امید نیک» آرقهلی ایلنمه یۉل بیلن اروپا و اۉرته دېنگیزدن اۉتیب جیددهگه یېتکزیلماقده بو اېسه یۉلنی تخمیناً۹۰۰۰ کیلو مترگه اوزهیتیریب، بیر نېچه هفتهگه کېچیکیشگه سبب بۉلماقده.
یاردم تشکیلاتلری خرجتلرنی کمهیتیریش اوچون هرمز بۉغازی آرقهلی «انسانپرورلیک یۉلهگی» آچیشنی طلب قیلماقده. اولرنینگ فکریچه، بوندهی یۉلک آرقهلی کمیده تیقیلیب قالگن یوکلرنی خوفسیز اۉتکزیب، احتیاجمندلرگه تېزراق یېتکزیش ممکن بۉلهدی.
