افغان خبرچیلری مصونیت کمیتهسی «خلق ارا مطبوعات اېرکینلیگی کونی» مناسبتی بیلن کابلده طالبان نمایندهلری، فعال میدیا تشکیلاتلری باشلیغلری و اَیریم ژورنالیستلر اشتراکیده ییغیلیش اۉتکزدی.
اوشبو ییغیلیشده قتنهشگن ژورنالیستلرنینگ ایتیشیچه، اونده بعضی عیال ژورنالیستلر هم اشتراک اېتگن، بیراق اولر علیحده جایده، پرده آرتیده اۉتیرگن.
ییغیلیشده قتنشگن بیبیسی خبرچیسی ببرک احساس عیال و اېرکک ژورنالیستلر اۉرتهسیده پرده تارتیلگنینی و عیال ژورنالیستلر عیناً اۉشه پرده آرتیده اۉتیرگنینی ایتگن.
«افغان خبرچیلر مصونیت کمیتهسی» معلوماتیگه کۉره، اطلاعات و فرهنگ وزیرلیگینینگ نشرات اۉرین باسری حیاتالله مهاجر فراهی، مذکور وزیرلیک سۉزلاوچیسی خبیب غفران و ایچکی ایشلر وزیرلیگینینگ سۉزلاوچیسی عبدالمتین قانع قۉشیمچه، طلوع نیوز، آریانا، یک تلویزیونی، پژواک خبرگزارلیگی، کلید گروپ، خامه پرس، رادیو بیگم، شمشاد رادیو تلویزیون مسووللر همده خبرچیلر، یېتکرمهلر نمایندهلری مملکتده عاموی اخبارات واسطهلرینی حمایت قیلووچی نهادلر اشتراک قیلگن اېدیلر.
بو تشکیلات ییغیلیشده اشتراک اېتگن اکثریت اېرکک قتنشچیلرنینگ اسملرینی کېلتیرگن، بیراق هېچ بیر عیال اشتراکچینینگ نامینی قید اېتمهگن.
طالبان 2021-ییلده افغانستاننی قَیته اېگهلهگنیدن بېری، عیال ژورنالیستلر فعالیتیگه کېنگ چېکلاولر جاري قیلگن و اولرنی تلویزیونده چیقیش پیتیده قاره نقاب (مسک) تقیشگه مجبور قیلگن.
