اطلاعات روز بنیادینینگ اجرایی کاتبی بیل مککارن «خلق ارا مطبوعات اېرکینلیک کونی» مناسبتی بیلن کابلدهگی محلی خبرچی حمید فرهادی قماقدن آزاد اېتیلیشینی سۉرهدی.
مککارن ایکس اجتماعی ترماغیده نشر قیلگن پُستیده، مطبوعات اېرکینلیگی کونی مناسبتی بیلن ۲۰۲۴ییل ۳دسامبردن بېری طالبان قماقخانهسیده سقلنهیاتگن حمید فرهادی حالتیگه اعتبار قرهتیشگه چقیرگنینی ایتدی.
اونینگ قۉشیمچه قیلیشیچه، فرهادی ایشلهگن اطلاعات روز گزېتهسی عیاللر حقوقلرینی یاریتگنی سببلی طالبان تامانیدن تعقیقلنگن.
طالبان ایچکی ایشلر وزیرلیگی کوچلری۲۰۲۴-ییل۳-سپتمبرده حمید فرهایدنی کابلدن حبسگه آلگن. او ۱۹-سپتمبر کونی طالبان محکمهسی تامانیدن «پروپاگنده» قیلیش و «اطلاعات روز» گزېتهسی بیلن همکارلیک قیلیش عیبلاوی بیلن ایکّی ییلگه قملگن.
طالبان ۲۰۲۵-ییل ۲۸-مارچ کونی فرهادینی هېچ قندهی ایضاح و آلدیندن آگاهلنتیریشسیز پلچرخی قماقخانهسیدن بگرام قماقخانهسیگه کۉچیرگن و او حاضرده شو یېرده سقلنماقده.
اوّلراق خلق ارا عفو تشکیلاتینینگ خبر بېریشیچه، فرهادی عایلهسی او بیلن آییگه فقط بیر مرته و۳۰دقیقه دوامیده اوچرهشیش امکانیگه اېگه.
طالبان افغانستان اوستیدن ینه نظارتنی قۉلگه آلگنیدن بېری ژورنالیستلرنی بیر نېچه بار حبسگه آلیب، قماققه تشلهگن.
بو گروه سورگنده فعالیت یوریتهیاتگن یېتکرمهلر بیلن همکارلیکنی جنایت دېب اعلان قیلگن و اَیریم ژورنالیستلرنی عیناً شو عیبلاو بیلن قماققه حکم قیلگن.
