پاکستان تشقی ایشلر وزیرلیگینینگ مطبوعات سۉزلاوچیسی طاهر اندرابی، مملکتی و افغانستاندهگی طالبان اۉرتهسیده رمضان هییتی مناسبتی بیلن اعلان قیلینگن وقتینچهلیک صلحدن سۉنگ، بو گروهنینگ «چېگرهوي و نشانسیز هجوملری» همده «طالبان قۉللب-قوّتلهیاتگن هند نیابتی کوچلری تامانیدن پاکستان ایچیده عملگه آشیریلگن ترورچیلیک فعالیتی» عاقبتیده۵۲ کیشی هلاک بۉلگنی، ینه۸۴ کیشی جراحتلنگنینی معلوم قیلدی.
او اوشبو رقملرنی بوگون (شنبه، 12-ثور) بویوک بریتانيانینگ افغانستان بۉییچه مخصوص وکیلی ریچارد لیندسینینگ سۉنگگی بیاناتلریگه جوابن اعلان قیلگن.
ریچارد لیندسی اۉتگن هفته پاکستاننینگ افغانستان شرقیدهگی کنر ولایتیگه اویوشتیرگن هجوملری و بیر نېچه تینچ اهالی وکیللرینینگ هلاک بۉلیشیدن سۉنگ، «افغانستان-پاکستان چېگرهسی بۉیلب زۉرآورلیکلر، جملهدن کنر هجوملریدن خواطردهمن»، دېب یازگن اېدی.
او «تینچ اهالینی حمایه قیلیش و کېسکینلیکنینگ ینه-ده کوچهییشینینگ آلدینی آلیش اوچون برچه چارهلر کۉریلیشی کېرهک»، دېیه قۉشیمچه قیلگن.
پاکستان تشقی ایشلر وزیرلیگی مطبوعات سۉزلاوچیسی بو فکرلرنی «چېگرهدهگی وضعیتنی چوقور توشونمسدن بېریلگن بیریاقلهمه بیانات» دېب اتهدی.
او شوندهی دېدی: «بوندهی اساسسیز بیاناتلر، تروریزم ایلدیزلریگه اعتبار قرهتمسدن، موازنتلی و خالص تصور بېرمهیدی. بیز منطقوي جریانلرنی، پاکستاننینگ پرنسپیال موضعینی و خلقیمیزنینگ تروریزمگه قرشی کورهشدهگی بېقیاس قربانلیکلرینی تۉغری توشونیشگه چقیرهمیز.»
اندرابينینگ ینه یازیشیچه، «۲۰۲۶ییل مارچ آییده اعلان قیلینگن وقتینچهلیک صلحگه قرهمهی، افغانستان تامانیدن ترانسچېگرهوي هجوملر و ترورچیلرنینگ کیریب کېلیش اورینیشلری دوام اېتماقده» و بونینگ عاقبتیده پاکستان حدودیده۵۲ کیشی هلاک بۉلیب،۸۴ کیشی یرهلنگن.
او پاکستان «اۉزینی تيگن حالده، طالبان پازیتسيهلری و ترورچیلرنی قۉللب-قوّتلاوچی آستقورمهلرنی انیق نشانگه آلیب ثمرهلی جواب قَیترگنینی، شونینگدېک، کۉپلب کیریب کېلیش اورینیشلرینی برطرف اېتگنینی» دعوا قیلدی.
پاکستان تشقی ایشلر وزیرلیگی سۉزلاوچسی افغانستاندهگی هجوملرده تینچ اهالی قربان بۉلگنی حقیدهگی خبرلرنی رد اېتیب، اولرنی «ایشانچسیز» دېب اتهدی.
اۉتگن هفته پاکستان کنر ولایتینینگ مرکزی و بیر نېچته تومنلرینی نشانگه آلگن، جملهدن ولایت مرکزی اسعدآباددهگی بیلیم یورتیگه هم ضربه بېرگن اېدی.
طالبان معلوماتیگه کۉره، بو هجوملرده کمیده۷ کیشی هلاک بۉلگن،۹۰دن آرتیق کیشی یرهلنگن، اولر آرهسیده عیاللر و بالهلر هم بار.
بیرلشگن ملتلر تشکیلاتینینگ افغانستاندهگی ادارهسی (یوناما) اېسه، پاکستان نامینی تیلگه آلمهگن حالده، کنر ولایتیدهگی هجوملرده، جملهدن بیلیم یورتدهگی ضربهده «اۉنلب آدملر هلاک بۉلگن و یرهلنگنینی» تصدیقلهگن.
طالبان و پاکستان اۉرتهسیدهگی تۉقنهشوولر ایکّی آیدن آرتیق دوام اېتماقده. شو دورده تامانلر فقط رمضان هییتی کونلریده تورکيه، سعوديه عربستانی و قطر واسطهچیلیگیده وقتینچهلیک صلحگه راضی بۉلیشگن، بیراق اوندن کېین چېگرهدهگی تۉقنهشوولر ینه دوام اېتگن.
تورلی دولتلر، جملهدن چین واسطهچیلیک قیلیشگه اورینگن بۉلسه-ده، تامانلر حاضرچه ماجرانی تۉختهتیش بۉییچه کېلیشووگه اېریشه آلمهگن.
