پاکستان اوردوسینینگ معلوم قیلیشیچه، اوشبو مملکت کوچلری تامانیدن اۉتکزیلگن ایکّی علیحده عملیات نتیجهسیده افغانستان بیلن چېگرهداش منطقهلرده ۱۳عصیانچی اۉلدیریلگن.
پاکستان اوردوسی بیاناتیگه کۉره، بیرینچی عملیات خیبرپختونخواه ایالتی نینگ مهمند اولسواللیگیده اۉتکزیلیب، اونده «هندستان قۉللب-قوّتلهیاتگن ‘فتنه الخوارج» گروهی نینگ۸ اعضاسی یۉق قیلینگن.
پاکستان حکومتی و اوردوسی «فتنه الخوارج» اتَمهسینی تحریک طالبان پاکستان اوچون ایشلهتهدی.
اوردونینگ قۉشیمچه قیلیشیچه، ایکّینچی عملیات شمالي وزیرستانده اۉتکزیلیب، اونده اوشبو گروهنینگ ینه۵ اعضاسی اۉلدیریلگن.
بیاناتگه کۉره، بو عملیاتلر اوشبو شخصلرنینگ افغانستان بیلن چېگرهداش حدودلر آرقهلی پاکستانگه کیریب کېلیشگه اورینیشلری انیقلنگچ باشلنگن.
پاکستان اوردوسینینگ تأکیدلشیچه، بو اورینیشلر «افغانستان طالبان رېجیمی نینگ اۉز تامانیده چېگرهلرنی ثمرهلی باشقریشنی تأمینلشدهگی موفقیتسیزلیگینی ینه بیر بار اثباتلهیدی.»
شونینگدېک، اوردونینگ بیلدیریشیچه، «افغانستان طالبان رېجیمی اۉز مجبوريتلریگه عمل قیلیشی، خوارج تامانیدن افغانستان حدودیدن فایدهلنیلیشی نینگ و اونینگ فقرالرینینگ پاکستان ایچیدهگی ترورچیلیک فعالیتیده اشتراک اېتیشی نینگ آلدینی آلیشی کېرهک.»
پاکستان ایلگری هم بیر نېچه بار افغانستان حدودیدن اونگه قرشی فایدهلنیلهیاتگنینی دعوا قیلگن و تحریک طالبان پاکستان افغانستان حدودیدن فایدهلنیب، پاکستانده هجوملر اویوشتیرهیاتگنینی بیلدیرگن.
بیراق، افغانستاندهگی طالبان رسميلری بو عیبلاولرنی رد اېتیب، هېچ بیر گروهگه افغانستان حدودیدن باشقه مملکتلرگه قرشی فایدهلنیشگه رخصت بېرمسلیکلرینی اَیتماقده.
