افغانستان سابق جمهور رییسی حامد کرزی بیرلشگن ملتلر تشکیلاتینینگ بالهلر جمغرمهسی یونیسفنینگ عیاللر و قیزلر تعلیمی همده ایشگه قۉییلگن چېکلاولرنینگ عاقبتلری حقیدهگی ینگی گزارشیگه خواطر بیلدیرگن.
او بوگون (پنجشنبه، ۱۰ثور) ایکس اجتماعی ترماغیده یازیشیچه، قیزلر اوچون مکتب و بیلیم یورتلرینینگ یاپیق قالیشی مملکتنینگ ملي امکانیتینی ضعیفلشتیرهدی همده افغانستاننی تشقی یاردمگه ینه-ده قرهم قیلیب قۉیهدی.
سابق جمهور رییس ینه بیر بار طالباندن قیزلر اوچون مکتب و عالي تعلیم مؤسسهلرینی امکان قدَر تېزراق قَیته آچیشنی طلب قیلگن.
کرزینینگ تأکیدلشیچه، اگر قیزلر و اۉغیل بالهلر اوچون تعلیم امکانیتی یرهتیلسه، مملکت معمالرینی یاشلر اۉزلری حل قیله آلهدی و افغانستان تشقی قرهملیکدن چیقهدی.
یونیسفنینگ ینگی گزارشیگه کۉره، اگر چېکلاولر دوام اېتسه، افغانستان ۲۰۳۰-ییلگچه۲۰ مینگ ملَکهلی اۉقیتووچی و بېش مینگ ۴۰۰کیشی ملَکهلی طبیات خادیمیدن محروم بۉلهدی.
شونینگدېک، تشکیلاتنینگ تأکیدلشیچه، تعلیمدن چېتده قالگن قیزلر سانی۲ میلیوندن آشیب کېتهدی.
طالبان حاکمیتگه قَیتگنیدن بېری ۶-صنفدن یوقاری قیزلر تعلیمینی منع قیلگن. بوندن تشقری، بیلیم یورتلر و طبیات انستیتوتلری اېشیکلری قیزلر اوچون یاپیلگن، عیاللرنینگ دولت ادارهلری، نادولت تشکیلاتلر و بیرلشگن ملتلر تشیکلاتی مؤسسهلریده ایشلشی هم منع اېتیلگن.
