بیرلشگن ملتلر تشکیلاتینینگ انسان حقوقلری بۉییچه مخصوص گزارشگری ریچارد بنت، طالباننینگ رسماً اعلان قیلینگن «مبلغلر تۉغریسیدهگی قانونی» خلق ارا انسان حقوقلری معیارلریگه ضد بۉلیب، حنفی مذهبیگه اوستونلیک بېرووچی دیني کمسیتیشنی اۉز ایچیگه آلهدی دېگن.
بنت بوگون کېچقورون (چهارشنبه، 9-ثور) ایکس اجتماعی ترماغیده یازیشیچه: «خواطر بیلن قید اېتهمن، مبلغلر تۉغریسیدهگی قانون افغانستانده رسماً اعلان قیلیندی و او خلقارا انسان حقوقلری قانونلریگه ضد روشده حنفی مذهبیگه اوستونلیک بېرووچی دیني کمسیتیشنی نظرده توتهیاتگندېک کۉرینهدی.»
اونینگ قۉشیمچه قیلیشیچه، «انسان حقوقلری اېتنیک و دیني آزچیلیکلرنی حمایه قیلهدی،» و او مذکور قانوننی تۉلیق تحلیل قیلهیاتگنینی بیلدیرگن.
طالبلر عدلیه وزیرلیگی تیناوون معلوم قیلیشیچه، گروه رهبری هبتالله آخوندزاده «مبلغلر تۉغریسیدهگی قانون»نی تصدیقلهگن و اونگه کۉره «مبلغلر مسلمان و حنفی مذهبیگه منسوب بۉلیشی شرط».
مذکور قانونگه موافق، مبلغلر حنفی مذهبیگه اساسلنیب ترغیبات آلیب باریشی، شونینگدېک، ترغیبات جاییگه وایهگه یېتمهگنلر و عیاللرنی اۉزی بیلن آلیب بارمسلیگی کېرهک.
اوشبو قانونگه کۉره، افغانستاندهگی باشقه اسلامي مذهبلر، جملهدن شیعهلر وکیللری مبلغلیک قیلیش اوچون مناسب دېب تاپیلمهیدی.
طالبان بو قانونده مبلغلرگه قوییدهگیلرنی ترغیب قیلیشنی یوکلهگن: علم فضیلتلری، ایمان، اهل سنت و جماعت عقیدهسینی اۉرگهتیش، برچه عبادتلرنی اۉرگهتیش، جهاد و زکات فضیلتلرینی بیان قیلیش، آته-آنه، فرزند، قۉشنی، اېر-خاتین و عیاللر حقوقلرینی توشونتیریش، امیرگه اطاعت، حجاب فرضی، یخشی اخلاق، مسجد آدابلری و باشقه مهم دعوت مسألهلری.
قانونده، شونینگدېک، طالبان منصبدارلری، اولر نینگ کوچلری و افغانستان اهالیسی مبلغلر بیلن همکارلیک قیلیشگه مجبور اېتیلگن.
طالبان افغانستانده حاکمیتنی قَیته اېگهلهگنیدن بېری برچه قانون و قاعدهلرنی حنفی فقهگه اساسلب ترتیبگه سالماقده و اوشبو مذهبنی رسمي مذهب صفتیده اعلان قیلگن.
بو گروه افغانستانده شیعه مذهبینینگ رسمي مقامینی بېکار قیلگن و تورلی حالتلرده اونینگ طرفدارلرینی اۉز قاعدهلریگه، یعنی حنفی فقهگه عمل قیلیشگه مجبور قیلگن.
