اروپا کمیسیونی افغانستانگه مهاجرلرنی دېپورت قیلیش مسألهسی بۉییچه طالبان هیئتینی بروکسلگه تکلیف اېتیلگنی حقیدهگی گزارشلرنی رد اېتدی.
اروپا کمیسیونی مطبوعات سۉزلاوچیلریدن بیری مارکوس لامرت مطبوعات انجمنیده: «بروکسلده عملدهگی افغانستان رسميلری (طالبان) بیلن اوچرهشوو اۉتکزیلیشی رېجهلشتیریلگنینی یاکه بو بارهده تکلیفنامه یوباریلگنینی تصدیقلهی آلمهیمن دېب ایتدی.»
او شو بیلن بیرگه، مهاجرلرنی افغانستانگه قَیتریش مسألهسی بۉییچه طالبان بیلن علاقهلر «تخنیکي درجهده» دوام اېتهیاتگنینی تصدیقلب، بو علاقهلر «ینگی اېمس»لیگینی تأکیدلهدی.
اروپا کمیسیونی سۉزلاوچیسینینگ قۉشیمچه قیلیشیچه، بو علاقهلر اۉتگن ییل اکتبر آییده اروپا نینگ۲۰ دولتینینگ ایچکی ایشلر و مهاجرلر وزیرلری تامانیدن کمیسیونگه یوباریلگن مکتوبدن سۉنگ باشلنگن.
اونینگ سۉزلریگه کۉره، اوشبو وزیرلر اروپا اتفاقی و کمیسیوندن افغانستانگه مهاجرلرنی دېپورت قیلیشنی قۉللب-قوّتلشنی کوچهیتیریشنی سۉرهگن.
مرکوس لهمېرت ینه شونی تأکیدلهدی: اروپاده قالیش حقوقیگه اېگه بۉلمهگن یاکه خوفسیزلیککه تهدید دېب حسابلنگن شخصلر افغانستانگه دېپورت قیلینهدی و بو بارهده قرارنی اروپا اتفاقیگه اعضا هر بیر دولت مستقل روشده قبول قیلهدی.
اونینگ قۉشیمچه قیلیشیچه: شونگه قرهمهی، افغانستاندهگی نازک وضعیت، آغیر مهاجرت و انسان حقوقلری حالتی اَیریم معمالرنی یوزهگه کېلتیرماقده و بو مسألهلر کومپلېکس همده موافقلشتیریلگن طرزده حل اېتیلیشی کېرهک؛ اولر حاضر عیناً شو یۉنهلیشده ایش آلیب بارماقده.
اوّلراق فرانسه خبر آژانسی طالباننینگ تخنیکي هیئتی احتمال یازدن آلدین بروکسلگه باریب، مهاجرلرنی افغانستانگه دېپورت قیلیش مسألهسیده اروپالیک رسميلر بیلن مذاکره اۉتکزیشینی خبر قیلگن اېدی.
اوشبو خبر گزارلیکنینگ یازیشیچه، بو سفرنی موافقلشتیریشنی اروپا کمیسیونسی و اونینگ اَیریم اعضا دولتلری ذمّهسیگه آلگن.
اروپا دولتلری رد اېتیلگن باشپناه عریضهچیلرینی افغانستانگه قَیتریش یۉلینی تاپیشگه اورینماقده و شو مقصدده طالبان بیلن علاقهلرنی کوچهیتیریشگه حرکت قیلماقده.
