بیرلشگن ملتلر تشکیلاتی باش کاتبی آنتونیو گوترش فرانسه دیپلوماتی برونو لمارکی افغانستاندهگی بیرلشگن یاردم ادارهسی (یوناما) باشلیغینینگ اۉرینباسری همده بیرلشگن ملتلر تشکیلاتینینگ انسانپرورلیک یاردملرنی موافقلشتیریش باشقرمهسی (اوچا) باشلیغی اېتیب تعیینلهدی.
او حاضرگی یوناما باشلیغی اۉرینباسری و اوچانینگ افغانستاندهگی عملدهگی باشلیغی اندریکا راتواته ایندریکهدن کېین اوشبو لوازمنی اېگهلهدی.
یوناما بوگون (سهشنبه، 8-ثور) نشر قیلگن بیاناتیده ایتیلیشیچه، برونو لمارکی 2022-ییلدن بویان کانگو دیموکراتیک جمهوریتیدهگی بیرلشگن ملتلر تشکیلاتی تینچلیکپرور ادارهسیده باش کاتب مخصوص وکیلینینگ اۉرینباسری، شونینگدېک، مملکتده انسانپرورلیک مسألهلر بۉییچه موافقلشتیرووچی صفتیده فعالیت یوریتیب کېلماقده.
بیاناتگه کۉره، او بو دور مابینیده «مرکّب و کۉپ اۉلچاولی شرایطلرده بحرانلرنی باشقریش، رواجلنیش، قَیته قوریش، انسانپرور ایشلر و تینچلیکنی مستحکملش» بۉییچه کېنگ تجربه آرتتیرگن.
یوناما شونینگدېک، لمارکی بوندن آلدین بیرلشگن ملتلر تشکیلاتینینگ سیاسي ادارهسیده باش کاتب مخصوص وکیلینینگ اۉرینباسری و انسانپرورلیک مسألهلر بۉییچه موافقلشتیرووچی لوازمیده ایشلهگنینی معلوم قیلگن. شونینگدېک، او بیرلشگن تشکیلاتی ترقیات دستوری و بمت نینگ بحرانلرنینگ آلدینی آلیش بۉییچه ادارهسیده فعالیت یوریتگن همده ساومالیا،هاییتی، فلسطین حدودلری و کامبوج کبی مملکتلرگه خدمت سفرلریده بۉلگن.
