طالبلر تشقی ایشلر وزیری امیرخان متقی و سعودی عربستان تشقی ایشلر وزیری فیصل بن فرحان بیلن تیلفون آرقهلی گپلشدی.
طالبان تشقی ایشلر وزیرلیگی بوگون (یکشنبه، ۶-ثور) نشر قیلگن بیاناتیگه کۉره، تامانلر «ایکّی تامانلهمه مناسبتلر، سعوديه عربستانیده یشهیاتگن افغانستانلیکلرگه یرهتیلهیاتگن قولهیلیکلر همده منطقوي مسألهلر» یوزهسیدن فکر المشگن.
متقی صحبت دوامیده طالبان نظارتیدهگی افغانستان بیلن سعوديه عربستانی اۉرتهسیدهگی علاقهلرنی رواجلنتیریش ضرورلیگینی تأکیدلب، منطقهده برقرارلیکنی تأمینلش بارهسیدهگی سعوديه سعی-حرکتلرینی قدرلهگن.
شونینگدېک، او سعوديه عربستانیده یشهیاتگن افغانستانلیکلرگه «معلومات اوزهتیش» بارهسیده یرهتیلگن قولهیلیکلر اوچون منّتدارلیک بیلدیریب، ایشلرنی ثمرهلیراق یۉلگه قۉییش مقصدیده طالباننینگ سعوديهدهگی دیپلوماتیک وکالتخانهلری صلاحیتینی آشیریشنی سۉرهگن.
بیاناتگه کۉره، سعوديه تشقی ایشلر وزیری هم دیپلوماتیک مناسبتلرنی کېنگهیتیریش ضرورلیگینی قید اېتیب، دیپلوماتیک ماموریتلر صلاحیتینی آشیریشنی قۉللب-قوّتلهگن.
او، شونینگدېک منطقهدهگی برقرارلیک برچه اوچون مهم اېکنینی تأکیدلب، ماجرالرنی یکونلشده ملاقات و دیپلوماتيک نینگ اهمیتیگه اورغو بېرگن.
سعوديه عربستانی اوّل طالبان و پاکستان اۉرتهسیده واسطهچیلیک قیلگن اېدی.
بیراق سعوديه واسطهچیلیگیده طالبان تامانیدن اوچ نفر پاکستانلیک فقرا آزاد اېتیلگنیدن کۉپ اۉتمهی، پاکستان افغانستان نینگ اَیریم حدودلریگه هوا هجوملری اویوشتیرگن و نتیجهده تامانلر اۉرتهسیده ینگی باسقیچدهگی کېسکینلیک یوزهگه کېلگن.
گرچه حاضرده اوشبو تۉقنهشوولر سېزیلرلی درجهده کمهیگن بۉلسه-ده، تامانلر حلی هم ماجرانی یکونلش و کېلیشماوچیلیکلرنی حل اېتیش بۉییچه هېچ قندهی رسمي کېلیشوو امضالهمهگن.
