طالبلر عدلیه وزیرلیگینینگ معلوم قیلیشیچه، کابلنینگ غربیده جایلشگن «امیدسبز» شهرچهسیگه تېگیشلی ۵۰۷.۴۹ مینگ جریب یېر مخصوص محکمه قراری بیلن (امارتی) دېب اعلان قیلیندی.
وزیرلیک بوگون (یکشنبه، ۶-ثور) نشر قیلگن بیاناتیده ایتیلیشیچه، مرکزي زون بۉییچه «اېگهللب آلینگن یېرلر»نی کۉریب چیقیش مخصوص محکمه حجتلر و دلیللرنی تېکشیریب، مذکور حدوددهگی برچه یېر دولتگه تېگیشلی دېگن خلاصهگه کېلگن.
رسميلرگه کۉره، تېکشیروو دوامیده یېر بېش کادستر بۉلهگیده دولت نامیگه قید اېتیلگنی و حقیقی یاکه حکمی شخصلرگه اۉتکزیلمهگنی انیقلنگن. شو اساسده محکمه اوشبو یېرلرنی دولت ملکی دېب اعلان قیلیب، ایشنی یېرلرنی قَیتریش و اېگهللب آلیش نینگ آلدینی آلیش کمیسیونسیگه تاپشیرگن.
مذکور یېرلر کابل شهری نینگ آلتینچی و اۉن اۉچینچی ناحیهلریده جایلشگن بۉلیب، «امید سبز» شهرچهسی اساسن هزاره اهالیسی یشهیدیگن منطقه حسابلنهدی.
بو شهرچه سۉنگگی ییگیرمه ییل ایچیده برپا اېتیلگن و اَیریم منبعلرگه کۉره، محمد کریم خلیلی اوکهسی محمد نبی خلیلین اونینگ ییریک اولوشدارلریدن بیری حسابلنهدی.
طالبان حاکمیتگه قَیتگنیدن بېری اۉنلب شوندهی شهرچهلر تېکشیریلیب، اولرنینگ یېرلری «امارتی» دېب اعلان قیلینگن. بیراق ملکدارلر جریان دوامیده حجتلر خالصانه کۉریب چیقیلمهیاتگنیدن شکایت قیلماقده.
