«افغانستاندهگی جواب کوزهتوو» تشکیلاتی اروپا کمیسیونی تامانیدن طالباننینگ «تخنیکي هیئتی»نی افغانستانگه مهاجرلرنی دېپورت قیلیش مسألهسینی محاکمه قیلیش اوچون قبول قیلیش احتمالی بارلیگی حقیدهگی خبرلردن چوقور خواطر بیلدیردی.
اوشبو تشکیلات بیاناتیده ایتیلیشیچه، انسان حقوقلرینی، خصوصاً عیاللر حقوقلرینی جدّي روشده بوزهیاتگن و خلقارا قانونلر دایرهسیدهگی مجبوریتلرنی حرمت قیلمهیدیگن توزیلمه وکیللرینی قبول قیلیش اروپا اتفاقینینگ افغانستان بیلن علاقهلر بۉییچه مېزانلریگه ضد حسابلنهدی.
«افغاستاندهگی جواب کوزهتوو» تشکیلات «تخنیکي هیئت» اتَمهسی دیپلوماتیک نقاب صفتیده ایشلهتیلمسلیگی کېرهکلیگینی تأکیدلب، بو آرقهلی طالبان رژیمینی نارملشتیریشگه یۉل آچیلیشی ممکنلیگیدن آگاهلنتیرگن.
تشکیلاتگه کۉره، بروکسل گه تکلیف قیلیش طالبان فایدهسیگه خدمت قیلهدی، اولر نینگ ایچکی مشروعیت دعوالرینی و ترانسچېگرهوي حرکتلرینی کوچهیتیرهدی همده آخر-عاقبت افغانستان فقرالریگه نسبتاً ینهده کۉپراق چېکلاولر قۉللنیشیگه آلیب کېلیشی ممکن.
افغانستاندهگی جواب کوزهتوو تشکیلاتی شونی هم تأکیدلهدیکی، هر قندهی شخصنینگ حقوقي مقامیدن قطع نظر، طالبان نظارتی آستیدهگی افغانستانگه دېپورت قیلیش اولرنی اۉزباشیمچهلیک بیلن حبسگه آلیش، قییناققه سالیش، اۉلیم و مجبوري یۉقالیش کبی جدّي انسان حقوقلری بوزیلیشلریگه دچار قیلیشی ممکن.
تشکیلات اروپا دولتلری جملهدن بلجیم، سویدن، آلمان، اترش و سویس تامانیدن مهاجرلرنی افغانستانگه دېپورت قیلیشگه اورینیشلر خلقارا قاچقینلر حقوقی، اروپا اتفاقی اساسي حقوقلر نظامی، انسان حقوقلری بۉییچه اروپا کانوانسیونی و «مجبوري قَیتریب یوبارمسلیک» تمایلینی بوزیشی ممکنلیگینی بیلدیرگن.
او اروپا کمیسیونی و اعضا دولتلردن طالبان بیلن هر قندهی اوچرهشوو یاکه تکلیفلرنی بېکار قیلیشنی همده بیرلشگن ملتلر تشکیلاتی خوفسیزلیک کېنگشی تامانیدن جاري اېتیلگن چېکلاولرگه قطعي رعایه قیلیشنی طلب قیلگن.
فرانسه اخبارات آژانسی خبریگه کۉره، طالبان هیئتی یقین هفتهلرده برکسلگه باریب، اروپا اتفاقیدن افغانستانگه مهاجرلرنی دېپورت قیلیش مسألهسینی محاکمه قیلیشی کوتیلماقده. بو سفر اروپا کمیسیونی و اَیریم اعضا دولتلر تامانیدن موافقلشتیریلماقده.
بیراق حاضرچه اوشبو هیئتگه رسمي تکلیف یوباریلگنی تصدیقلنمهگن. اروپا دولتلری اېسه عینِ پیتده، اینیقسه جنایت صادر اېتگن مهاجرلرنی افغانستانگه قَیتریش یۉللرینی ایزلهماقده. آلمان الّهقچان بو جریاننی باشلهگن و سۉنگگی پیتلرده اَیریم مهاهجرلرنی طالبان بیلن تۉغریدن-تۉغری موافقلشتیریلگن حالده دېپورت قیلگن.
