لاجورد یولی تحقیقات مرکزی تورکيهنینگ انقره شهریده افغانستاندهگی وضعیت و منطقوي اۉزگریشلرگه بغیشلنگن ایکّی کونلیک انجمن باشلنگنینی معلوم قیلدی. اوشبو ییغیلیشده طالبان مخالفتی وکیللری، مدنی جماعهچیلیک فعاللری و ایشبیلرمانلر اشتراک اېتماقده.
مرکزنینگ بیلدیریشیچه، «سیاسي ترانسفرمیشن و منطقوي ترتیب، اۉزگریب بارهیاتگن ژیوپولتیک منظرهده افغانستان» ناملی اوشبو انجمن بوگون (جمعه، ۴-ثور) باشلنیب، اېرتهگه هم دوام اېتهدی.
لاجورد یۉلی تحقیقات مرکزینینگ تأکیدلشیچه، مذکور اوچرهشوو «تنقیدي سیاسي ملاقاتلر اوچون میدان یرهتیش، افغانستاننینگ منطقوي و خلقارا سیاسي توزیلمهلردهگی اۉزگریب بارهیاتگن اۉرنینی محاکمه قیلیش همده کانتروکتیف همکارلیک و سیاسي برقرارلیککه اېریشیش یۉللرینی ایزلش» مقصدیده تشکیل اېتیلگن.
انجمننینگ بیرینچی کونیده معروضهچیلر قطاریده اسلامی جنبش حزبی رهبری عبدالرشید دوستم نینگ راحله دوستم هم اشتراک اېتیب نطق سۉزلهگن.
او اۉز نطقیده افغانستاننینگ اساسي معمالریدن بیری صفتیده حاکمیت نینگ مرکزلشووی، باشقروو تیزیمینینگ حددن تشقری مرکزيلشگنلیگی، عدالتسیزلیک و کۉپلب ملتلر نینگ کمسیتیلیشینی تیلگه آلدی.
راحله دوستمنینگ ایتیشیچه، بو حالت تورلی اېتنیک گروهلرنینگ سیاسي قرارلر قبول قیلیش جریانیده حقیقي اشتراک اېتیشیگه تۉسقینلیک قیلگن همده جمعیتده عدالتسیزلیک و ایشانچسیزلیک کیفیتینینگ کوچهییشیگه آلیب کېلگن.
شونینگدېک، او سۉنگگی بېش ییل ایچیده، طالبلر افغانستانده حاکمیتنی قۉلگه آلگنیدن بېری، اېتنیک کمسیتیش و طرفکشلیک خواطرلی درجهده کوچهیگنینی تأکیدلهدی.
انجمن اشتراکچیلری افغانستاندهگی وضعیتنی محاکمه قیلیش بیلن بیرگه، منطقوي اۉزگریشلرنینگ اوشبو مملکتگه تأثیرینی هم تحلیل قیلگن.
لاجورد یۉلی تحقیقات مرکزی بوندن آلدین هم افغانستان موضوعسیده شوندهی ییغیلیشلرگه مېزبانلیک قیلیب کېلگن بۉلیب، اونده متخصصلر، اکادمیکلر و سیاسيتچیلر اشتراکیده مملکتدهگی موجود وضعیتنی تحلیل قیلیشگه حرکت قیلیب کېلماقده.
