خلق ارا قیزیل خاچ کمیتهسینینگ معلوم قیلیشیچه، طالبان و پاکستان اۉرتهسیدهگی تۉقنهشوولر عاقبتیده نورستان ولایتینینگ کامدیش و برگ متال اولسواللیکلریده اهالیسی آلتی هفتهدن آرتیق وقت دوامیده آزیق-طعام، طبي خدمتلر و باشقه اساسي احتیاجلردن محروم بۉلگن.
تشکیلات بوگون (سهشنبه،۱-ثور) نشر قیلگن بیاناتیده، یۉللر آچیلگچ، افغانستان قیزیل یریم آی جمعیتی و جهان آزیق-طعام دستوری بیلن بیرگهلیکده اوشبو ایکّی اولسواللیککه آزیق-طعام محصولاتلری، طبي اسکونهلر و ضرور یاردملرنی یېتکزیب بېرهیاتگنینی بیلدیرگن.
قیزیل خاچ کمیتهسینینگ ایتیشیچه، بو ایکّی اولسواللیکده سۉنگگی ایکّی آی دوامیده تخمیناً۱۳۶ مینگ کیشی خوفسیزلیک معمالری و کیریش چېکلاولری سببلی جدّي آزیق-طعام تنقیصلیگی، طبي خدمتلر یېتیشماوچیلیگی و کوندهلیک ضرور بویوملر کمچینیگی بیلن یوزلشگن.
تشکیلاتنینگ قۉشیمچه قیلیشیچه، افغانستان قیزیل یریم آی جمعیتی و جهان آزیق-طعام دستوری بیلن بیرگهلیکده جاري آی باشیدن باشلب قوراللی ماجرادهگی برچه تامانلر بیلن دایمي مذاکرهلر آلیب بارگن. مقصد، کامدیش و برگ متال تومنلریدهگی اهالیگه مستقل انسانپرور تشکیلاتلرنینگ خوفسیز و تۉسیقسیز کیریشینی تأمینلش اېدی.
قیزیل خاچ معلوماتیگه کۉره، اوشبو مذاکرهلردن سۉنگ یاردم تشکیلاتلری ضرور یاردملرنی یېتکزیشنی باشلهگن. بیرینچی باسقیچده آزیق-طعام، طبي جهازلر و باشقه ضرور انسانپرورلیک یاردملری اوشبو حدودلرگه یوباریلماقده.
تشکیلاتنینگ بیلدیریشیچه، نورستان ولایتیگه آلیب بارووچی یۉل آچیلگچ، بازارلرده هم استه-سېکین تأمینات تیکلنماقده و بېمارلرنی شاشیلینچ طبي یاردم آلیش اوچون تشیش ینه یۉلگه قۉییلگن.
پاکستان طالبان بیلن تۉقنهشوولر باشلنگچ، نورستاننینگ برگ متال و کامدیش تومنلریگه آلیب بارووچی اساسي یۉلنی یاپگن اېدی. شوندن سۉنگ بو حدودلرده آزیق-طعام و طبي خدمتلر کېسکین کمهیگنی حقیده خبرلر ترقهلگن.
طالبان نینگ نورستاندهگی ولایت حاکملیگی۲۴-حمل کونی اوشبو یۉل ایکّی تامان چېگرهسیدهگی قبیله آقسقاللری واسطهچیلیگیده آچیلگنینی و داریوار همده طبي یوکلرگه اۉتیشگه رخصت بېریلگنینی بیلدیرگن.
