طالبلر عالي محکمهسی بیر کونده فراه، جوزجان و بلخ ولایتلریده ۴۲کیشیگه نسبتاً جماعت آلدیده دره جزاسی اجرا اېتیلگنینی معلوم قیلدی.
محکمه بوگون (شنبه، ۲۹-حمل) نشر قیلگن بیاناتیده، پنجشنبه کونی فراه ولایتینینگ بلابلوک اولسواللیگیده۱۴ کیشی «لواطت» عیبی بیلن جماعت آلدیده دره اوریلگن.
طالبان عالي محکمهسی بیاناتیگه کۉره، اوشبو شخصلرگه۲۰ تهدن۳۹ تگهچه دره ضربهسی بېریلگن.
محکمه باشقه بیر بیاناتیده ایتیشیچه، اۉشه کونی ینه ۲۷کیشی جملهدن ایکّی عیال، جوزجان ولایتیده «الکول ایچیملیک ایشلب چیقریش، استعمال قیلیش و سوداسی، رۉزه توتمسلیک، آته-آنهنی رنجیتیش همده زنا» عیبلاولری بیلن جماعت آلدیده دره اوریلگن.
بیاناتگه کۉره، بو جزالر جوزجان شهر باشلنغیچ محکمهسی حکمی اساسیده بېریلگن بۉلیب، هر بیریگه۲۰ دن۳۹ تگهچه دره اوریلگن.
شونینگدېک، ینه بیر شخص بلخ ولایتی نینگ بلخ اولسواللیگیده «ناقانوني مناسبتلر» عیبی بیلن۳۹ ضربه دره بیلن جزالنگن.
مذکور جزالر طالباننینگ باش قاضیسی تصدیقیدن سۉنگ اجرا اېتیلگنی ایتیلگن.
طالبان افغانستانده قَیته حاکمیتگه کېلگنیدن بویان بیر نېچه بار شخصلرنی جماعت آلدیده دره اورگن و۱۲ نفر شخصنی یوزلب تماشابینلر آلدیده قتل اېتگنی حقیده خبرلر بار.
خلق ارا انسان حقوقلری تشکیلاتلری بوندهی جزالرنی خلقارا قانونلر و انسان قدر-قیمتیگه ضد دېب حسابلب، اولرنی تۉختهتیشگه چقیرماقده.
