منبعلرگه کۉره، هرات بیلیم یورتیده طالبلر محصللردن حنفی مذهبیگه عمل قیلیش و طالبان تیزیمی همده فرمانلریگه بۉیسونیش بۉییچه مجبوريتنامه امضالشنی طلب قیلگن.
منبعلرنینگ ایتیشیچه، اوشبو مجبوريتنامه بوگون اېرتهلب (شنبه، ۲۹-حمل) محصللر آرهسیده ترقهتیلگن و اونی امضالش مجبوري اېکنی ایتیلگن.
مذکور مجبوريتنامه نینگ آلتینچی بندیده، اونینگ نسخهسی «اطلاعات روز» گزېتهسیگه یېتیب کېلگن، قوییدهگیچه یازیلگن: «افغانستان خلقی اهل سنته و الجماعه بۉلیب، امام اعظم ابو حنیفه رحمت الله مذهبیگه اېرگشهدی. مېن هم بیرلیک و اتفاقنی سقلش مقصدیده اوشبو مذهبگه عمل قیلهمن.»
باشقه بندلرده اېسه محصللر قوییدهگیلرگه مجبور اېکنلیگی قید اېتیلگن: بېلگیلنگن وقتده و جماعت بیلن نماز اۉقیش، سنتگه موافق سقال قۉییش، بیلیم یورتی حدودیده باش کییمسیز یورمسلیک، «شرعي و افغاني کییم» کيیش، موسیقی و قۉشیقلردن بوتونلهی واز کېچیش، جانلی موجوداتلر تصویریدن فایدهلنمسلیک، طالبان قانون و فرمانلریگه حرمت بیلن قرهش همده طالبان توزومیدن باشقه هېچ قندهی سیاسي گروه بیلن علاقهده بۉلمسلیک.
مذکور حجتگه کۉره، محصللر اوشبو شرطلرنی بوزسه بیلیم یورتی تامانیدن بېریلهدیگن هر قندهی جزاگه نسبتاً شکایت قیلیش حقوقیگه اېگه بۉلمهیدی.
اوّلراق هم طالبان مملکت نینگ باشقه دولت بیلیم یورتلریده هم شونگه اۉخشش مجبوريتنامهلر ترقهتگنی و طلبهلردن حنفي مذهبیدن باشقه مذهبلرگه عمل قیلمسلیکنی طلب قیلگنی حقیده خبرلر ترقهلگن اېدی.
عینِ پیتده مملکتدهگی کۉپلب طلبهلر و اۉقیتووچیلر شیعه مذهبی همده سنّیلیکنینگ باشقه تۉرت مذهبیگه منسوب حسابلنهدی.
طالبان قَیته حاکمیتگه کېلگنیدن سۉنگ افغانستانده حنفی مذهبینی یگانه رسمي مذهب دېب اعلان قیلگن و شیعه مذهبی نینگ رسمي مقامینی بېکار قیلگن.
گروه رسمیلری بیر نېچه بار اهالیگه فقط حنفی مذهبیگه عمل قیلیشنی توصیه اېتگن همده شیعهلر کبی باشقه مذهبلر اېرکینلیگیگه تورلی چېکلاولر جاري قیلگن.
