بیرلشگن ملتلر تشکیلاتینینگ متخصصلری طالبان تشقی ایشلر وزیری امیرخان متقیگه مکتوب یۉللب، اوشبو گروهدن «محکمهلرنینگ جزاوي نظامی»دهگی خلقارا قانون و کانوانسیونلرگه ضد مادّهلر یوزهسیدن ایضاح بېریشنی سۉردی.
مکتوبده بیرلشگن ملتلر تشکیلاتی متخصصلری نظامنینگ اېنگ تشویشلی جهتلرینی، جملهدن قول و خۉجهیین توشونچهلریگه اشاره قیلینیشی، حنفي مذهبیدن باشقه اعتقاددهگیلر، خصوصاً شیعهلرنینگ «بدعتچی» دېب اتهلیشی، آدملرنینگ علمالر، اشراف، اۉرته و قویی طبقهلرگه کمسیتووچی طرزده بۉلینیشی همده عیاللرگه نسبتاً زۉروانلیک مسألهلرینی باتفصیل تحلیل قیلگن.
اولر طالباندن اوشبو مادّهلرنی افغانستاننینگ خلق ارا انسان حقوقلری مجبوريتلری بیلن، جملهدن انسان حقوقلری خلق ارا اعلامیهسی، مدنی و سیاسی حقوق خلق ارا میثاقی، زوروانلیکنی منع قیلیش کنوانسیونی، و باشقه شفقت سیز جزالر و یانده شوولر، باله لر حقوقی کنوانسیونی افغانستان تامانیدن تصویب بولگن عیاللرگه قرشی هر قندهی بیر تبعیض و شونینگدیک طالبلرنی حجتلر بیلن موافقلشتیریشنی طلب قیلگن.
متخصصلر، شونینگدېک، اوشبو نظامنی ایشلب چیقیشده افغانستان اساسی قانونی و طالبان نینگ قانونچیلیک حجتلرینی قبول قیلیش ترتیبیگه عاید فرمانیگه رعایه اېتیلمهگنینی، شونینگدېک حکومتدن تشقری شخصلر بیلن مصلحتلشوولر اۉتکزیلمهگنینی بیلدیرگن.
اولرنینگ تأکیدلشیچه، نظامده جوده ناانیق و حددن تشقری کېنگ تعریفلر قۉللنیلگن بۉلیب، بو کوتیلمهگن عاقبتلرگه آلیب کېلیشی یاکه قصداً سوءاستعمال قیلیش و باشقه حقوقلرنینگ بوزیلیشیگه زمین یرهتیشی ممکن.
بیرلشگن ملتلر تشکیلاتی متخصصلری ینه بو حجت فقط پشتو تیلیده اعلان قیلینگنینی و اونینگ افغانستان نینگ باشقه رسمي تیلی بۉلگن دری تیلیدهگی رسمي نسخهسی یۉقلیگینی قید اېتگن.
اولر نینگ فکریچه، دری تیلی کۉپلب ولایتلرده کېنگ قۉللنیلیشی سببلی، ترجمه نینگ یۉقلیگی محکمه و اداری اۉرگانلر تامانیدن اونی بیر خیلده توشونیش و قۉللشگه تۉسقینلیک قیلیشی، حقوقي انیقلیکنی ضعیفلشتیریشی ممکن.
متخصصلر اَیریم مادّهلر قانون آلدیده تېنگلیک، عدالتلی محکمه حقوقی، بالهلر حقوقلری، جنسي و جندر اساسیدهگی زۉرآورلیکدن جبرلنگنلر حقوقلری، دین و اعتقاد اېرکینلیگی، سۉز اېرکینلیگی، ییغیلیش و بیرلشیش اېرکینلیگی همده شخصي حیات دخلسیزلیگینی بوزیشینی تأکیدلهگن.
اولر مکتوبده جمعی 24 ته مهم مسألهنی کۉرسهتیب اۉتگن بۉلیب، اولر آرهسیده قانونچیلیک جریانی، اۉزباشیمچهلیک بیلن کېنگ قۉللش خوفی، کمسیتمسلیک، تېنگلیک، قول و خۉجهیین توشونچهلری، جوابگر بۉلمهگن شخصلرگه جزانی اجرا اېتیش وکالتی بېریلیشی، «جماعت منفعتلری» اوچون اۉلیم جزاسی قۉللنیشی، بالهلر حقوقلری حمایهسی، دین و اعتقاد اېرکینلیگی، سۉز اېرکینلیگی، شخصلرنی کمسیتیشدن حمایه قیلیش و نامتناسب جزالر مسألهلری موجود.
متخصصلر، شونینگدېک، طالباندن اوشبو نظامنی دری تیلیده اعلان قیلیش رېجهلری بار-یۉقلیگینی هم توشونتیریشنی سۉرهگن.
اولر مکتوب نسخهسینی افغانستاننینگ جنیوادهگی وکالتخانهسیگه هم یوبارگنینی و طالباننینگ جوابینی اۉز رسمي وبسایتیده اعلان قیلیشلرینی بیلدیرگن.
طالبان رهبری تخمیناً اوچ آی اوّل اوشبو «جزاوي نظام»نی تصدیقلب، اونی بوتون مملکت سودلریگه اجرا اوچون یوبارگن اېدی.
مذکور نظام قبول قیلینگچ، کېنگ ناراضیلیکلرگه سبب بۉلیب، کۉپلب دولتلر، خلقارا تشکیلاتلر و سیاسي گروهلر اونینگ عاقبتلریدن خواطر بیلدیریب، اونی بېکار قیلیشنی طلب قیلگن.
