هرات ولایتینینگ انجیل اولسواللیگیده تینچ اهالی، خصوصاً شیعه مذهبیگه منسوب کیشیلرگه قیلینگن هجوم قربانلرینینگ دفن مراسمی بوگون (سهشنبه، ۲۵حمل) مینگلب ولایت اهالیسی اشتراکیده اۉتکزیلدی.
دفن مراسمی هرات شهریدهگی «صادقيه» جامع مسجدیدن باشلنگن و کېین قربانلردن سکّیز کیسی «سلطان آقه» زیارتگاهیده دفن اېتیلگن.
ینه اوچ نفر قربان انجیل اولسواللیگینینگ «دهمیری» قیشلاغی اهالیسی، اۉز قیشلاقلریده یېرگه قۉییلگن.
قوراللی هجومچیلر جمعه کونی انجیل تومنیدهگی «دهمیری» قیشلاغیده جایلشگن بیر زیارتگاه یقینیده شیعه اهالیسینی نشانگه آلیب هجوم قیلگن اېدی.
بیرلشگن ملتلر تشکیلاتینینگ افغانستاندهگی یاردم ادارهسی (یوناما) معلوماتیگه کۉره، اوشبو هجومده۱۱کیشی هلاک بۉلگن و ینه ۱۱ کیشی جراحت آلگن.
هراتدهگی طالبان اخبارات و مدنیت باشقرمهسی اېسه۱۱ کیشی هلاک بۉلگنینی تصدیقلهگن، بیراق یرهلنگنلر سانینی۸ نفر دېب بیلدیرگن.
حاضرچه اوشبو هجوم اوچون هېچ بیر شخص یاکه گروه جوابگرلیکنی اۉز ذمّهسیگه آلمهگن.
سۉنگگی ییللرده هرات ولایتیده شیعه و هزارهلر بیر نېچه بار نشانلی قوراللی هجوملرگه اوچرهگن. بعضی حالتلرده بو هجوملر اوچون داعش مسوولیتنی اۉز ذمّهسیگه آلگن، بعضی حالتلرده اېسه هېچ قندهی گروه جوابگرلیکنی تن آلمهگن.
