بیرلشگن ملتلر تشکیلاتینینگ افغانستاندهگی یاردم ادارهسی یونامانینگ تصدیقلشیچه، هرات ولایتی انجیل اولسواللیگیده تینچ اهالیگه قیلینگن هجومده۱۱ کیشی هلاک بۉلگن و ینه ۱۱ کیشی جراحتلنگن.
یوناما بوگون (یکشنبه، ۲۳-حمل) اعلان قیلگن بیاناتیده ایتیلیشیچه، بو هجوم «شیعه مذهبیگه عاید زیارتگاه قرشیسیدهگی دَم آلیش جاییده»، دهمیری منطقهسیده صادر اېتیلگن و قربانلر آرهسیده عیاللر همده بالهلر بار.
یوناما ادارهسی نینگ سرپرستی جورجت گانیون شوندهی دېدی: «بیز اوشبو دهشتلی جنایتدن جبر کۉرگن قربانلر و اولرنینگ عایلهلریگه همدردلیک بیلدیرهمیز همده یرهدارلرگه تېزراق ساغهییب کېتیشنی تیلهیمیز.»
اونینگ قۉشیمچه قیلیشیچه: «بوتون افغانستان بۉیلب اهالینی قوراللی زۉرآورلیکدن حمایه قیلیش اوچون، عملدهگی حاکمیتدن اوشبو حادثه یوزهسیدن تۉلیق تېرگاو اۉتکزیشنی سۉرهیمیز.»
جمعه کونی ساعت تخمیناً۳:۰۰ ده قوراللنگن شخصلر هراتنینگ انجیل اولسواللیگیده دهمیری حدودیده شیعهلرگه هجوم قیلیب، اولرنی «اۉققه توتگن».
طالباننینگ هراتدهگی اخبارات و مدنیت باشقرمهسی بو هجومده ۱۱کیشی هلاک بۉلگنینی و۸ کیشی یرهلنگنینی معلوم قیلگن. طالبان ایچکی ایشلر وزیرلیگی اېسه قربانلر سانینی ۷ نفر اۉلیک و۱۳ نفر یرهدار دېب اعلان قیلگن اېدی.
حاضرچه هېچ بیر شخص یاکه گروه اوشبو هجوم اوچون جوابگرلیکنی اۉز ذمّهسیگه آلمهگن.
طالباننینگ هراتدهگی اخبارات و مدنیت باشقرمهسی گمانلنووچیلردن بیری قۉلگه آلینگنینی و باشقه هجومچیلرنی اوشلش بۉییچه حرکتلر دوام اېتهیاتگنینی بیلدیرگن.
هرات ولایتیده یشاوچی شیعهلر و هزارهلر سۉنگگی ییللرده بیر نېچه بار نشانلی قوراللی هجوملرگه اوچرهگن.
بعضی حاللرده اوشبو هجوملر اوچون جوابگرلیکنی «اسلامي دولت» (داعش) گروهی اۉز ذمّهسیگه آلگن.
