طالبلرنینگ هرات ولایتیدهگی اخبارات و مدنیت ریاستی باشلیغی احمدالله متفی هرات ولایتینینگ انجیل اولسواللیگیده تینچ اهالیگه قیلینگن هجومده جراحت آلگنلردن ینه یېتّی نفری وفات اېتگنی سببلی قربانلر سانی ۱۱ نفرگه یېتگنینی ایتدی.
او بوگون (شنبه، ۲۲حمل) معلوم قیلیشیچه، ینه سکّیز نفر یرهدار هرات ولایت شفاخانهسیده دوالنیشده.
طالبان رسميلری اوشبو هجوم قربانلری حقیده بیر-بیریگه ضد رقملر بېرماقده. گروه نینگ هراتدهگی اخبارات و مدنیت ریاستی اوّلیگه تۉرت کیشی اۉلدیریلگن و ۱۵کیشی یرهلنگنینی بیلدیرگن اېدی، حاضر اېسه اۉلگنلر سانی ۱۱نفرگه یېتگنینی اَیتماقده.
اما طالبان ایچکی ایشلر وزیرلیگی تیناوون کېچقورون بېرگن بیاناتیده دستلبکی معلوماتلرگه کۉره، بو هجومده ۷کیشی اۉلدیریلگنی و ۱۳کیشی یرهلنگنی، اَیریم یرهدارلرنینگ احوالی آغیر اېکنینی بیلدیرگن. وزیرلیک حاضرگچه قربانلر بۉییچه ینگی رقم اعلان قیلمهگن.
محلي منبعلر اېسه بو هجومده تخمیناً ۲۰ کیشی هلاک بۉلگنی و ینه بیر نېچه کیشی جراحت آلگنینی اَیتماقده.
اطلاعات روز گزېتهسی قۉلگه کیریتگن قربانلر رۉیخطیگه کۉره، بو هجومده کمیده ۲۶کیشی اۉلدیریلگن یاکه یرهلنگن. رۉیخطده کمیده اوچ باله و بېش عیال نامی هم بار.
قوراللنگن شخصلر تیناوون توشدن کېین ساعت۳:۰۰اطرافیده هرات ولایتی انجیل اولسواللیگینینگ «دهمېری» حدودیده شیعه فقرالرگه هجوم قیلگن.
محلي منبعلرگه کۉره، تۉرت نفر قوراللنگن هجومچی اوّل اېرککلرنی عیاللردن اجرهتیب، اولرنینگ قۉللرینی باغلب، سۉنگ اولرنی آتیب تشلهگن.
منبعلرنینگ ایتیشیچه، هجومچیلر کېین قۉرقوودن قاچگن عیاللر و بالهلرگه هم اۉق اوزگن، نتیجهده اولرنینگ بیر قِسمی هلاک بۉلگن و یرهلنگن.
ایتیشلریچه، قربانلرنینگ بیر قِسمی «دهمېری» قیشلاغینینگ اصل اهالیسی، باشقهلری اېسه هرات شهرینینگ «بکرآباد» حدودیدن بۉلیب، دَم آلیش اوچون «دهمېری»گه بارگن بۉلگن.
هراتدهگی محلي طالبان رسميلری اوشبو هجوم بیلن باغلیق حالده بیر کیشی حبسگه آلینگنینی و باشقه هجومچیلرنی قۉلگه آلیش ایشلری دوام اېتهیاتگنینی اَیتماقده.
حاضرگچه هېچ بیر شخص یاکه گروه بو هجوم اوچون جوابگرلیکنی اۉز ذمّهسیگه آلمهگن.
سۉنگگی ییللرده هراتدهگی شیعه و هزارهلر بیر نېچه بار قوراللی هجوملر نشانیگه ایلنگن. بعضی حالتلرده بو هجوملر اوچون «داعش» گروهی جوابگرلیکنی اۉز ذمّهسیگه آلگن.
