کنر ولایتیدهگی محلي منبعلرنینگ معلوم قیلیشیچه، طالبان و پاکستان کوچلری اۉرتهسیدهگی تۉقنهشوولر «ناری» تومنینینگ چېگره حدودلریده بوگون توشدن باشلنگن و حاضرگچه دوام اېتماقده.
منبعلرگه کۉره، اوشبو تۉقنهشوولر دوامیده پاکستاننینگ توپخانهی هجوملری نتیجهسیده ناری اولسواللیگی «برېکوت» قیشلاغیده کمیده ایکّی تینچ اهالی یرهلنگن و اولر شفاخانهگه یېتکزیلگن.
معلوماتلرده ایتیلیشیچه، بو رقملر دستلبکی بۉلیب، یرهدارلر سانی آرتیشی ممکن. شونینگدېک، تۉقنهشوولر محلي اهالیگه هم ضرر یېتکزگنی، اما ضرر مقداری حلی انیق اېمسلیگی بیلدیریلگن.
طالبلر محلي رسميلری حاضرچه بو واقعهلر یوزهسیدن ایضاح بېرمهگن.
بوندن تشقری، منبعلر پاکستان بوگون نورستان ولایتینینگ کامدیش اولسواللیگیگه کمیده ۷ته راکت اوچیرگنی حقیده هم خبر بېرگن. حاضرچه بو هجوملر عاقبتیدهگی تلفات و ضررلر حقیده انیق معلومات یۉق.
کنر چېگرهسیدهگی بو کېسکینلیک ایکّی مملکت وکیللری چیننینگ اورومچی شهریده۷ کونلیک مذاکرهلرده وضعیتنی کېسکینلشتیرهدیگن حرکتلردن تيیلیش بۉییچه کېلیشووگه اېریشگن بیر پیتده یوز بېرماقده.
