طالبلر تشقی ایشلر وزیرلیگینینگ معلوم قیلیشیچه، اوشبو گروه و پاکستان اۉرتهسیدهگی مذاکرهلر چیننینگ اورومچی شهریده یکونلنگن.
طالبان تشقی ایشلر وزیرلیگی نینگ سۉزلاوچیسی عبدالقهار بلخي بوگون (چهارشنبه، ۱۹حمل) اعلان قیلگن بیاناتیده مذاکرهلر «ایجابی محیطده» اۉتگنینی بیلدیرگن.
اونینگ ایتیشیچه، اوچرهشووده ایکّی تامانلهمه مناسبتلر، خوفسیزلیک مسألهلری و منطقوي برقرارلیککه عاید موضوعلر یوزهسیدن کېنگ قمراولی محاکمهلر اۉتکزیلگن.
طالبان تشقی ایشلر وزیرلیگی اوشبو جریان «ایشانچنی مستحکملش، برقرار علاقهلر، اۉزارا توشونیش و ثمرهلی همکارلیکنی کوچهیتیریشگه خدمت قیلهدی»، دېگن امید بیلدیرگن.
شونینگدېک، وزیرلیک چین خلق جمهوریتیگه اوشبو مذاکرهلرگه مېزبانلیک قیلگنی و کۉرسهتگن خیریخواهلیگی اوچون منّتدارلیک بیلدیرگن.
طالبان اۉتگن هفته پنجشنبه کونی پاکستان بیلن مذاکره اۉتکزیش اوچون هیئت اورومچیگه یوباریلگنینی تصدیقلهگن اېدی.
بوندن آلدین پاکستان یېتکرمهلری بو مذاکرهلر چیننینگ مخصوص وکیلی نینگ کابل و اسلام آبادگه قیلگن تشریفی دوامیده رېجهلشتیریلگنینی خبر قیلگن اېدی.
طالبان و پاکستان اۉرتهسیدهگی تۉقنهشوولر قریب بیر یریم آیدن بېری دوام اېتماقده. شو وقت ایچیده منطقهدهگی تورلی دولتلر ایکّی تاماننی ماجرانی تۉختهتیب، مذاکرهلرگه قَیتیشگه چقیرگن.
اۉتگن ییلی هم قیسقه مدتلی تۉقنهشوولردن سۉنگ تامانلر بیر نېچه بار مذاکره اۉتکزگن، بیراق یکونده معمالرنی حل اېتووچی کېلیشووگه اېریشیلمهگن.
اۉشه پیتده اساسي کېلیشماوچیلیک سببلریدن بیری صفتیده «تحریک طالبان پاکستان» (تیتیپی) گروهی نینگ افغانستاندهگی موجودلیگی کۉرسهتیلگن اېدی.
