طالبلرنینگ ننگرهار ولایتیدهگی محلي مسووللری بیر نېچه اوی تامی نینگ قولهب توشیشی عاقبتیده، مرکز و تومنلرده۹ کیشی، جملهدن عیاللر و بالهلر جان بېریب، ینه۴ کیشی یرهلنگنینی معلوم قیلدی.
ننگرهاردهگی اخبارات و مدنیت ادارهسی اخبارات بۉلیمی باشلیغی قریشی بدلوننینگ ایتیشیچه، تیناوون (دوشنبه، ۱۷حمل) جلال آباد شهری نینگ ۴-ناحیهسیدهگی «انگورباغ» منطقهسیده بیر اوی تامی قولهب توشیب، نتیجهده ۵ کیشی، جملهدن عیاللر و بالهلر هلاک بۉلگن، ینه۲ کیشی جراحت آلگن.
اونینگ قۉشیمچه قیلیشیچه، شیرزاد اولسواللیگینینگ «گندومک» قیشلاغیده هم بیر اوی تامی قولهب توشیب،۳ نفر عیال هلاک بۉلگن.
قریشی بدلون هسکه مېنه اولسواللیگیده کوچلی یاغینگرچیلیک سبب ایکّی اوینینگ تامی قولهب توشیب،۱ باله هلاک بۉلگن و۲ کیشی جراحت آلگن.
اونینگ ایتیشیچه، جراحتلنگنلر دوالنیش اوچون طبیات مرکزلریگه اۉتکزیلگن.
سۉنگگی یاغینگرچیلیکلر آرتیدن مملکتنینگ تورلی ولایتلریدن هم شونگه اۉخشش حادثهلر حقیده خبرلر کېلماقده.
کېچه هم ننگرهارده کمیده۶ کیشی شوندهی حادثهلر عاقبتیده هلاک بۉلگنی خبر قیلینگن اېدی.
