افغانستانده طالبلر نظارتی آستیدهگی طبيعي آفتلرگه قرشی کورهش ملی ادارهسی نینگ معلوم قیلیشیچه، سۉنگگی۲۴ ساعت ایچیده مملکتده یاغینگرچیلیک و سېل کېلیشی عاقبتیده کمیده۱۳ کیشی جان بېرگن، ینه ۱۳ کیشی یرهلنگن.
اوشبو ادارهنینگ سۉزلاوچیسی محمد یوسف حماد بوگون (یکشنبه،۱۶ حمل) ویدیو بیانات آرقهلی ایتیشیچه، بو یۉقاتیشلر کابل، پروان، کاپیسا، دایکندی، پکتیا، پکتیکا، ميدان وردک، غزنی، زابل، ارزگان، قندهار، هرات، نیمروز، غور، بادغیس، سمنگان، تخار، بدخشان، ننگرهار، لغمان و کنر ولایتلریده قید اېتیلگن.
اونینگ قۉشیمچه قیلیشیچه،۶ حملدن حاضرگچه مملکت بۉیلب یامغیر، سېل، زلزله و کۉچکی نتیجهسیده جمعی۹۹ کیشی هلاک بۉلگن،۱۵۴ کیشی اېسه جراحتلنگن.
طالبان طبيعي آفتلر بیلن کورهشیش ادارهسی سۉزلاوچیسی نینگ ایتیشیچه، بو دور ایچیده۹۵۵ ته اوی بوتونلهی،اوچ مینگ۹۹۹ ته اوی اېسه قسماً ویران بۉلگن.
شونینگدېک، یامغیر و سېل یوزلب کیلومتر یۉللرنی همده یوزلب جېریب اېکین یېرلرینی ویران قیلگنی ایتیلماقده.
۶حملدن بېری افغانستاننینگ تورلی ولایتلریده کوچلی یاغاینگرچیلیک و سېل کېلیشی کوزهتیلماقده. بو دورده بعضی حدودلرده قار یاغیشی هم قید اېتیلگن.
کوچلی یامغیرلر قورغاقچیلیک کمهییشیگه امید اویغاتگن بۉلسه-ده، کتّه تلفاتلرگه هم سبب بۉلگن.
