متقی بوگون (یکشنبه،۱۶ حمل) کابلده «افغانستان-مرکزي آسیا مصلحتی ییغینی»نینگ باشلنیشیده ایتیشیچه، طالبلر بو مذاکرهلرده «صداقت و یېچیمگه یۉنهلتیریلگن یاندشوو» بیلن اشتراک اېتماقده.
اونینگ قۉشیمچه قیلیشیچه، طالبلر دایما معمالرنی توشونیش، ملاقات و اۉزارا حرمتگه اساسلنگن مناسبتلر آرقهلی حل قیلیشگه اینتیلگن، بیراق شو بیلن بیرگه اۉز توپراغی و خلقینی حمایه قیلیش حقوقینی هم سقلب قالهدی.
طالبلر تشقی ایشلر وزیرلیگی پنجشنبه کونی بو گروه مذاکرهلر اۉتکزیش اوچون پاکستان بیلن گپلشیش مقصدیده اورومچیگه هیئت یوبارگنینی تصدیقلهگن اېدی.
وزیرلیککه کۉره، مذاکرهلر چین تشبثی و طلبیگه بناءً تشکیل اېتیلگن.
آلدینراق پاکستان عامهوي اخبارات واسطهلری هم بو مذاکرهلر حقیده خبر بېریب، جریان چین مخصوص وکیلینینگ کابل و اسلام آبادگه سفری دوامیده رېجهلشتیریلگنینی ایتگن اېدی.
طالبلر و پاکستان اۉرتهسیدهگی اوروش قریب بیر یریم آیدن بېری دوام اېتماقده.
سۉنگگی کونلرده تورلی دولتلر ایکّی تاماننی جنگلرنی تۉختهتیب، معمالرنی مذاکره آرقهلی حل قیلیشگه چقیرگن.
حاضرگچه اورومچیدهگی مذاکرهلر تفصیلاتلری آچیقلنمهگن.
