طالبلر رهبری هبتالله آخوندزاده اداری و رسمي حجتلرده قۉللنیلهیاتگن «خارجي اتَمهلر»نی تېکشیریش و اۉزگرتیریش بۉییچه فرمان چیقردی.
طالبلر عدلیه وزیرلیگی بوگون (یکشنبه، ۱۶ حمل) اوشبو تۉرت مادّهدن عبارت فرماننی نشر قیلدی.
فرماننینگ بیرینچی مادّهسیده ایتیلیشیچه، «خارجي اتَمهلر»نی تېکشیریش و اۉزگرتیریش اوچون عدلیه وزیرلیگی رهبرلیگیده، عالي تحصیلات، معارف و اخبارات و مدنیت وزیرلیکلری همده فنلر اکادمیهسی و اداره امور نمایندهلریدن عبارت هیئت توزیلهدی.
ایکّینچی مادّهده هبتالله آخوندزاده شوندهی دېگن، برچه دولت ادارهلری اۉز حجتلریده ایشلهتیلهیاتگن خارجي اتَمهلرنی ییغیب، اولر اوچون ماس مقابللرنی دلیللری بیلن بیرگه تیارلب، مخصوص بهالش هیاتیگه تاپشیریشی شرط.
اوچینچی مادّهنینگ بیرینچی بندیده قید اېتیلیشیچه، اوشبو هیئت دولت ادارهلری تامانیدن یوباریلگن خارجي اتَمهلرنی کۉریب چیقهدی، اسلامي و افغاني اتَمهلرنی انابتگه آلگن حالده اولرنینگ مقابل وریانتلرینی تنلهیدی و یکوني خلاصهنی رهبرگه تقدیم اېتهدی.
شونینگدېک، اوشبو مادّهنینگ ایکّینچی بندیده هیئت ضرورت توغیلگنده تېگیشلی ادارهلر وکیللرینی قۉشیمچه معلومات آلیش اوچون چقیریشی ممکنلیگی ایتیلگن.
تۉرتینچی مادّه اساسیده، بو فرمان چیقریلگن کوندن باشلب کوچگه کیرهدی و رسمي جریدده نشر قیلینهدی.
مذکور فرمانده «خارجي اتَمهلر»گه انیق تعریف بېریلمهگن.
بو فرمان شوندهی بیر پیتده چیقریلدیکی، طالبلر اوّل هم دولت ادارهلری لوحهلریدن فارسي سۉزلرنی آلیب تشلهگنی اوچون تنقید قیلینگن اېدی.
اوشبو حرکتلر سببلی بو گروه کېنگ مقیاسده «فارس تیلیگه قرشی سیاست» یوریتهیاتگنلیکده عیبلنماقده.
