کاونتری شهریده چهارشنبهدن پنجشنبهگه اۉتر کېچهسی بابر فرهنگی اویوشمه اعضالری اشتراکیده کۉکلم تویغولری شعر آقشامی عنوانی آستیده شکوهلی بیر محفل بۉلیب اۉتدی.
اویوشمه عضوی حاجی محمد احسان ابتکاری بیلن یۉلگه قۉییلگن بو ادبی دورهده کاونتری شهریدن تشقری بیرمینگهام، منچستر و باشقه ایریم شهرلردن اۉزبېکلر قتنشگندیلر.
شمعلر یاقیلگن تدبیرده قتنشگنلردن بیر قنچهسی تمانیدن بهار و ینگی ییل وصفیده عجایب شعرلرهم دکلمه قیلیندی.
بهار فصلی تاریخچهسی و اهمیتی و بو اودوم تورکلر آرهسیده قچانلردن تجلیل قیلینهیاتگنی بو عنعنهلرنی سقلش ضرورلیگی و کۉکلم موسمینینگ اجتماعی مدنی حیات بیلن باغلیق سیر و گۉزهللیکلری محفلده صحبت قیلگن کیشیلر تامانیدن معلومات بېریلیب اۉتدی.
عین پیتده سۉز یوریتکنلردن ایریملری کۉکلم فصلیده طبیعت ینگی بیر دورنی باشلهشی یم – یشیل رنگمه- رنگ اۉسیملیکلر کۉکریب جاذبهسی انسان کۉنگلینی قووانتیرگنی دقتگه لایق ایکنی هم علیحده تاکیدلندی.
شونینگدېک طبیعتدن انسان هم اۉز حیاتی ده ایجابی اۉزگریشلر کېلتیریش اوچون الهاملهنیب ینگی ریجهلر توزیشی کېرهکلیگی اوستیده تۉختهلیب اۉتیلدی.
همده چالغووچی ییگیتلردن بیری آرقهلی دایره و تبله هم چلیندی، قرسکلر آستیده ایریم قتنشووچیلر رقصگه توشیب دورهنی ینه-ده قیزیتدیلر.
ادبی دورهده قۉشیقلر سېسی آستیده یاریتگیچلر یاقیلیب همده گللر بیلن قۉللرده توتیلیب و بابر مدنی اویوشمهسی و منچستردن کېلگن مهمانلر بیلن ایسدهلیک صورتلرگههم توشدیلر.
