طالبلر تشقی ایشلر وزیرلیگی، اوشبو گروهنینگ اۉرته درجهدهگی هیاتی چینگه پاکستان تامانی بیلن مذاکرهلر اۉتکزیش اوچون یۉل آلگنینی تصدیلهدی.
وزیرلیک بوگون (پنجشنبه، ۱۳ حمل) اعلان قیلگن بیاناتیده ایتیلیشیچه، اوشبو مذاکرهلر ارومچی شهریده و چین نینگ تکلیفیگه بناءً اۉتکزیلماقده.
طالبلر تشقی ایشلر وزیرلیگینینگ معلوم قیلیشیچه، بو گروه مذاکرهلرده «موازنتلی یاندشوو» بیلن اشتراک اېتماقده همده قرشی تامان بیلن یخشی قۉشنیچیلیک، سودا علاقهلرینی مستحکملش و خوفسیزلیک مسألهلرینی ثمرهلی باشقریش یوزهسیدن کېنگ قمراولی و مسوولیتلی ملاقات آلیب باریشنی مقصد قیلگن.
وزیرلیکنینگ قۉشیمچه قیلیشیچه، طالبلر «اۉزارا حرمت، ایچکی ایشلرگه ارهلشمسلیک و کانتروکتیف توشونیشگه اساسلنگن دیپلوماتیک علاقهلر ایکّی دولت اۉرتهسیدهگی موجود معمالرگه عملي و برقرار یېچیملر تاپیشگه یاردم بېرهدی همده منطقهده برقرارلیک و همکارلیک اوچون زمین یرهتهدی»، دېب حسابلهیدی.
کېچه اَیریم پاکستان یېتکرمهلری ارومچیده اوشبو دولت و طالبلر وکیللری اۉرتهسیده مذاکرهلر باشلنگنینی خبر قیلگن اېدی.
خبرلرگه کۉره، بو مذاکرهلر چین مخصوص وکیلینینگ کابل و اسلام آبادگه تشریفی دایرهسیده رېجهلشتیریلگن.
طالبلر و پاکستان اۉرتهسیدهگی ماجرا بیر آیدن آرتیق وقتدن بېری دوام اېتماقده. بو دورده منطقهدهگی تورلی دولتلر تامانلرنی تۉقنهشوولرنی تۉختهتیب، مذاکرهلر چوکییگه قَیتیشگه چقیریب کېلماقده.
اۉتگن ییلی هم طالبلر و پاکستان اۉرتهسیده تخمیناً بیر هفتهلیک تۉقنهشوولردن سۉنگ بیر نېچه بار مذاکرهلر اۉتکزیلگن، بیراق یکونده کېلیشووگه اېریشیلمهگن.
اۉشه پیتده کېلیشماوچیلیکلرنینگ اساسي سببی صفتیده تحریک طالبان پاکستان (تیتیپی) نینگ افغانستان توپراغیده موجودلیگی کۉرسهتیلگن.
