آلمان تشقی ایشلر وزیرلیگی افغانستاننینگ بیرلیندهگی اېلچیخانهسیگه تعیینلنگن طالبان نمایندهسینی مؤقت ایشلر وکیلی صفتیده تن آلمهسلیگینی معلوم قیلدی.
دویچهوله خبریگه کۉره، آلمان تشقی ایشلر وزیرلیگی مطبوعات سۉزلاوچیسی اېلچیخانهدهگی هېچ قندهی کادر اۉزگریشی وزیرلیککه رسماً بیلدیریلمهگنینی ایتگن.
بوندن آلدین آلماننینگ «ایآردی» خبری ترماغی طالبان تامانیدن تنیشتیریلگن بیرنماینده بیرلیندهگی افغانستان اېلچیخانهسی رهبرلیگینی اۉز ذمّهسیگه آلگنی، اوّلگی حکومت تامانیدن تعیینلنگن مؤقت ایشلر وکیلی اېسه پستراق لوازمده ایشلهیاتگنی حقیده خبر بېرگن اېدی.
اما دویچهولهنینگ یازیشیچه، آلمان تشقی ایشلر وزیرلیگی وکیلی اوچون اېلچیخانه نینگ حالتی اۉزگرمهگن و اولر اوچون اوّلگی حکومت تامانیدن تعیینلنگن مؤقت ایشلر وکیلی هنوز اساسي علاقه نقطهسی حسابلنهدی.
اونینگ توشونتیریشیچه، ینگی وکیل اېلچیخانهده فقط اۉز دولتی تامانیدن رسمي روشده مېزبان دولتگه تنیشتیریلسه و مېزبان دولت اونگه ایشانچ یارلیغی بېرسهگینه اېلچی صفتیده تن آلینهدی. افغانستان اېلچیخانهسی حالتیده اېسه بوندهی جریان عملگه آشیریلمهگن.
آلمان حکومتی۲۰۲۵-ییل جولای آییده طالباننینگ ایکّی وکیلینی بېرلیندهگی افغانستان اېلچیخانهسیده قنسوللیک خادیمی صفتیده، مهاجرلرنی افغانستانگه دېپورت قیلیشنی آسانلشتیریش مقصدیده قبول قیلگن اېدی.
«ایآردی» خبریگه کۉره، حاضر اۉشه ایکّی کیشیدن بیری اېلچیخانهگه رهبرلیک قیلماقده و شو طریقه آلمان طالبان بیر اېلچیخانهنی عملده باشقرهیاتگن ایلک اروپا دولتیگه ایلنگن.
طالبان ینه حاکمیتنی اېگهلهگنیدن بېری آلمان «جنایت صادر اېتگن مهاجرلر»دن کۉپلبینی افغانستانگه دېپورت قیلگن و بو بارهده طالبان بیلن بېواسطه مذاکرهلر آلیب بارگن.
شونگه قرهمهی، آلمان حکومتی حاضرگچه طالبان حکومتینی رسماً تن آلمهگن و اولر بیلن رسمي دیپلوماتیک علاقهلر اۉرنتمهگن.
