افغانستاندهگی بیر قطار تشکیلاتلر و انسان حقوقلری فعاللری کابلدهگی «امید» اعتیاد مرکزیگه قیلینگن هجوم آرتیدن طالبلر و پاکستان اۉرتهسیدهگی زۉروانلیک کوچهییب بارهیاتگنی همده اونینگ تینچ اهالیگه ویرانکار تأثیریدن خواطر بیلدیریشدی.
اولر بیانات ترقهتیب، طالبلر و پاکستان اۉرتهسیدهگی اوروشنی درحال تۉختهتیش همده تینچ اهالیگه ضرر یېتکزیلیشینینگ آلدینی آلیش اوچون زودلیک بیلن چارهلر کۉریشگه چقیریشدی. جملهدن، یشاوچیلری اویلری، مکتبلر، شفاخانهلر و باشقه مهم تاسیساتلرنی حمایه قیلیش ضرورلیگینی تأکیدلشدی.
شونینگدېک، اولر انسان حقوقلری بوزیلیشی حالتلری زودلیک بیلن قید اېتیلیشی، مانیترینگ قیلینیشی و ایشانچلی میکانیزملر آرقهلی کۉریب چیقیلیشی کېرهکلیگینی بیلدیریشدی.
افغانستانلیک حقوق تشکیلاتلری و فعاللریگه کۉره، بو مملکتگه اۉنلب ییللر دوامیده اوروش مجبورن یوکلنگن، اما بو زۉروانلیکلر سیکلی نه خوفسیزلیک، نه برقرارلیک و نه عدالت آلیب کېلگن.
اولرنینگ تأکیدلشیچه، عکسینچه اوروشلر جمعیتلرنی ویران قیلگن، عایلهلرنی کۉچیشگه مجبور اېتگن و عذاب-عقوبتلرنی ینه-ده چوقورلشتیرگن، اینیقسه عیاللر و بالهلر بو وضعیتنینگ اېنگ آغیر یوکینی کۉتریشده دوام اېتماقده.
شونینگدېک، اولر مدنی جمعیتی، عامهوي اخبارات واسطهلری همده افغانستان مهاجر و سورگوندهگی جماعهلرینی هم زۉروانیکنی آقلاوچی یاکه ترغیب قیلووچی قرهشلرنی رد اېتیشگه چقیریشدی.
طالبلر و پاکستان اۉرتهسیدهگی تۉقنهشوولر اوچ هفتهدن آرتیق دوام اېتماقده.
بیرلشگن ملتلر تشکیلاتی معلوماتلریگه کۉره، اوشبو ماجرا دوامیده افغانستانده۲۰۰ دن آرتیق تینچ اهالی هلاک بۉلگن یاکه یرهلنگن، مینگلب آدملر اېسه اۉز اویلرینی ترک اېتیشگه مجبور بۉلگن.
