هند تشقی ایشلر وزیرلیگی پاکستاننینگ کابل شهریدهگی مخدرمادهگه بېریلگنلرنی دوالش شفاخانهسیگه اویوشتیرگن هوا هجومینی کېسکین قارهلهدی.
وزیرلیک بوگون (سهشنبه،۲۶ حوت) نشر قیلگن بیاناتیده «بو جسارتگه ضد و هېچ قندهی ایضاح بیلن آقلب بۉلمهیدیگن زۉروانلیک بۉلیب، کۉپلب تینچ اهالی حیاتینی آلدی؛ بو مرکز هېچ قچان قانوني حربي نشان حسابلنمهیدی دېگن.»
هند تشقی ایشلر وزیرلیگینینگ قۉشیمچه قیلیشیچه، «پاکستان حاضرگی وقتده بو قیرغینلرنی حربي عملیات صفتیده کۉرسهتیشگه اورینماقده.»
شونینگدېک، بیاناتده ایتیلیشیچه: «پاکستان تامانیدن عملگه آشیریلگن بو شفقتسیز حرکت افغانستاننینگ حاکمیتینی آچیقدن-آچیق بوزیش و منطقوي تینچلیک همده برقرارلیککه بېواسطه تهدید حسابلنهدی.»
وزیرلیک «اوشبو هجوم پاکستاننینگ دایمي احتیاطسیز خطی-حرکتلری و ایچکی معمالرینی چېگرهدن تشقریده زۉروانلیک آرقهلی یاپیشگه بۉلگن تکراري اورینیشلرینی کۉرسهتهدی دېب تاکیدلهگن.»
هند تشقی ایشلر وزیرلیگی شونینگدېک دنیا جماعهچیلیگیدن «بو جنایتنی عملگه آشیرگنلرنی جوابگرلیککه تارتیشگه و پاکستان تامانیدن افغانستاندهگی تینچ اهالیگه قرهتیلگن بېپروا هجوملرنی زودلیک بیلن تۉختهتیشگه چقیردی.»
وزیرلیک: «هندستان بو مناسبت بیلن چوقور همدردلیگینی بیلدیریش یانیده جراحت آلگنلرگه تېزده ساغهییشنی سۉرهیدی و بو قیغولی دَمده افغانستان خلقینینگ یانیده توریب، ینه بیر بار افغانستان حاکمیتی و یېر بوتونلیگینی قطعي قۉللب-قوّتلشینی تصدیقلهیدی»
کېچه کابلدهگی مخدرمادهگه بېریلگنلرنی دوالش مرکزی هوا هجومی آستیده قالگن.
طالباننینگ ایتیشیچه، هجوم پاکستان تامانیدن عملگه آشیریلگن بۉلیب، کمیده۴۰۰ کیشی هلاک بۉلگن و۲۵۰ کیشی جراحت آلگن.
حاضرگچه مستقل منبعلر اوشبو تلفاتلرنی تصدیقلهمهگن.
