طالبلر رهبری هبتالله آخوندزاده، هییت بیرهمی مناسبتی بیلن نشر قیلگن پیامیده دنیا دولتلریگه مراجعت قیلیب، «افغانستان خلقی نینگ اعتقاد و قدریتلریگه حرمت قیلینگ و ایچکی ایشلریمیزگه ارهلشمنگلر» دېب سۉرهگن.
بوگون (دوشنبه،۲۵ حوت) نشر قیلینگن اوشبو پیامده طالبان اسلام عالمی بیلن اسلامي ایناغهچیلیک اساسیده و «باشقه مملکتلر بیلن اسلامي تمایللرگه اساسلنگن فایدهلی و یخشی مناسبتلر» اۉرنتماقچی اېکنلیگی بیلدیریلدی.
طالبلر رهبری، اېران بیلن اوروشگه علیحده اعتبار قرهتمهی، بو گروه دنیا نینگ هر بیر بورچهگیده «مسلمانلرگه نسبتاً ناتۉغری حرکتلر و اولر نینگ حقوقلرینی بوزیشنی» ظلم دېب بیلیشینی و اېنگ کېسکین سۉزلر بیلن قارهلشینی ایتگن.
هبتالله آخوندزاده پیامیده طالبان بیلن پاکستان اۉرتهسیدهگی اوروشگه عاید هېچ قندهی بیانات بېریلمهگن و بو اوروشگه علیحده مراجعت قیلینمهگن.
طالبان افغانستان اوستیدن نظارتنی قَیته اۉرنهتگنیدن بېری بیر نېچه بار دنیا دولتلریدن افغانستان ایچکی ایشلریگه ارهلشمسلیکنی سۉرهگن.
اوشبو گروه انسان حقوقلری مسألهلری، خصوصاً عیاللر حقوقلری، سۉز اېرکینلیگی، عامهوي اخبارات واسطهلری و ژورنالیستلر اېرکینلیگی همده اهالینینگ اساسي و مدنی حقوقلرینی ایچکی ایشلر دېب حسابلهیدی و باشقه دولتلرنینگ تنقیدینی اۉز حکومتینینگ ایچکی ایشلریگه ارهلشیش دېب بیلهدی.
بیراق، دنیا دولتلری طالباننینگ عیاللر و قیزلر، شونینگدېک باشقه افغانستان فقرالریگه نسبتاً قیلهیاتگن حرکتلرینی خلقارا قانونلر و افغانستاننینگ خلقارا مجبوريتلرینی بوزیش دېب بیلهدی و قارهلهیدی.
