بیرلشگن ملتلر تشکیلاتینینگ افغانستاندهگی یاردم ادارهسی (یوناما) طالبان و پاکستان اۉرتهسیدهگی تۉقنهشوولر باشلنگنیدن بېری افغانستانده کمیده۷۵ نفر تینچ اهالی هلاک بۉلگنینی و ینه۱۹۳کیشی آغیر و یېنگیل یرهلنگنینی معلوم قیلدی.
یوناما بوگون (جمعه،۲۲ حوت) نشر قیلگن بیاناتیده، شونینگدېک، تیناوون کېچه پاکستاننینگ کابلگه اویوشتیرگن هوا هجوملری نتیجهسیده کمیده تۉرت کیشی تینچ اهالی هلاک بۉلگنی و ینه۱۴ کیشی، جملهدن عیاللر و بالهلر جراحت آلگنینی تصدیقلهدی.
بیرلشگن ملتلر تشکیلاتینینگ افغانستاندهگی یاردم ادارهسی تینچ اهالی آرهسیده ینه-ده کۉپراق تلفاتلرنینگ آلدینی آلیش اوچون زودلیک بیلن حربي حرکتلرنی تۉختهتیشگه چقیردی.
یونامانینگ تأکیدلشیچه، تینچ اهالی، اساسن عیاللر و بالهلر، طالبان و پاکستان اۉرتهسیده سۉنگگی پیتلرده کوچهیگن چېگرهوي زۉروانلیکلر اوچون اېنگ کتّه تاوان تۉلهماقده.
طالبان و پاکستان اۉرتهسیدهگی تۉقنهشوولر ایکّی هفتهدن آرتیق وقت دوام اېتماقده.
اوشبو تۉقنهشوولر دوام اېتر اېکن، پاکستان کېچه ینه افغانستاننینگ تۉرت ولایتیدهگی، جملهدن پایتخت کابلدهگی انشانلرگه هوا هجوملری اویوشتیردی.
طالباننینگ کابل خوفسیزلیک قوماندانلیگینینگ معلوم قیلیشیچه، کابل نینگ ۲۱ناحیهسیده بیر تورر-جای نشانگه آلینگن و نتیجهده تۉرت کیشی هلاک بۉلگن همده۱۵کیشی جراحت آلگن.
طالبان هم پاکستاننینگ کېچهگی هجوملریگه جوابن خیبرپختونخوا ایالتیدهگی حربي مرکزلر و انشاتلرنی هوا هجومیگه اوچرهتگنینی معلوم قیلگن.
