طالبلرنینگ تشقی ایشلر وزیری امیرخان متقی عمان تشقی ایشلر وزیری بدر البوسعیدی بیلن تیلفون آرقهلی پاکستان بیلن تۉقنهشوو حقیده صحبتلشدی.
طالبان تشقی ایشلر وزیرلیگی چهارشنبه (۲۰حوت) ایکس ترماغیده اوشبو صحبت حقیده بیانات اعلان قیلدی.
بیاناتگه کۉره، متقی صحبتده طالباننینگ پاکستان بیلن تۉقنهشوو بۉییچه موضعسینی توشونتیرگن.
شونینگدېک، بیاناتده تأکیدلنیشیچه، صحبت آخریده ایکّی تامان هم دیپلوماتيک یۉلینی تنلش و معمالرنی مذاکرهلر آرقهلی حل قیلیش ضرورلیگینی قید اېتگن.
طالبان تشقی ایشلر وزیرلیگی معلوماتیگه کۉره، ایکّی تامان صحبت دوامیده یقین شرقدهگی سۉنگگی واقعهلرنی خواطرلی دېب اتهب، «امریکا و اسرایلنینگ ایرانگه باستیریب کیریشی و اوروشنینگ منطقه باشقه دولتلریگه ترقهلیشینی» قارهلهگن.
طالبان و پاکستان اۉرتهسیدهگی اوروش تخمیناً ایکّی هفته آلدین باشلنگن و حلی هم دوام اېتماقده.
بو دورده پاکستان افغانستان نینگ تورلی ولایتلرینی هوا و راکت هجوملری بیلن نشانگه آلگن.
بیرلشگن ملتلر تشکیلاتی معلوماتلریگه کۉره، پاکستان هجوملریده کمیده۱۸۵کیشی هلاک بۉلگن یاکه یرهلنگن و ۲۰مینگدن آرتیق عایله کۉچیب کېتیشگه مجبور بۉلگن.
