طالبان تشقی ایشلر وزیرلیگی افغانستانده حبسده سقلنهیاتگن امریکا وطنداشلری مسألهسی بۉییچه امریکا بیلن ملاقات و همکارلیک قیلیشگه تیار.
طالبان تشقی ایشلر وزیرلیگی سۉزلاوچیسی عبدالقهار بلخی بوگون (سهشنبه، ۱۹حوت) نشر قیلگن بیاناتیده افغانستاننینگ «ناقانوني حبسلرنی قۉللب-قوّتلاوچی دولتلر» رۉیخطیگه کیریتیلگنیدن افسوس بیلدیردی. اونگه کۉره، سۉنگگی بیر ییل ایچیده طالبلر امریکا نینگ اَیریم حبسدهگی فقرالری مسألهسیده یخشی نیت بېلگیسی صفتیده ایجابي قدملر قۉیگن.
اونینگ قۉشیمچه قیلیشیچه، ایکّی تامان اۉرتهسیده تورلی درجهلرده مذاکرهلر هم بۉلیب اۉتگن. بو مذاکرهلر قطر دولتی واسطهچیلیگیده عملگه آشیریلگن و اونده هر ایکّی تامان بیر قطار ایجابي قدملر تشلشگه وعده بېرگن.
طالبان تشقی ایشلر وزیرلیگی سۉزلاوچیسینینگ ایتیشیچه، اولر امریکا وطنداشلرینینگ حبسگه آلینیشی بیلن باغلیق مسألهنی ایکّی تامان اۉرتهسیدهگی ملاقات وهمکارلیک آرقهلی تۉغری یۉل بیلن حل قیلیشنی ایستهیدی.
عبدالقهار بلخي، شونینگدېک امریکا قۉشمه ایالتلری تشقی ایشلر وزیری مارکو روبیونینگ سۉزلرینی رد اېتیب، هېچ بیر چېت اېل فقراسی المشوو یاکه سودا مقصدیده حبسگه آلینمهگنینی تأکیدلهدی.
اونینگ ایتیشیچه، اَیریم شخصلر عملدهگی قانونلرنی بوزگنلیکده عیبلنیب قۉلگه آلینگن و کۉپ حاللرده حقوقي جریانلر توگگچ، عادتي طرزده آزاد قیلینگن.
امریکا تشقی ایشلر وزیرلیگی بوگون تانگده طالبان نظارتیدهگی افغانستاننی «ناقانوني حبسلرنی قۉللب-قوّتلاوچی دولتلر» رۉیخطیگه کیریتگنینی اعلان قیلگن اېدی.
امریکا تشقی ایشلر وزیری مارکو روبیو طالبان حلی هم تروریستیک اصوللردن فایدهلنهیاتگنینی و آدملرنی تاوان پولی یاکه سیاسي امتیازلر آلیش اوچون اۉغیرلشینی ایتگن.
شونینگدېک، او طالباننی دنیس کویل و محمود حبیبی اسملی ایکّی نفر حبسدهگی امریکا فقراسینی زودلیک بیلن آزاد قیلیشگه همده «گروگه آلیش»گه بوتونلهی برهم بېریشگه چقیرگن.
