طالبان تشقی ایشلر وزیری امیرخان متقی گروه بیلن پاکستان اۉرتهسیده دوام اېتهیاتگن جنگلر حقیده گپیریب، اولر «مجبوري اوروش»گه دوچ کېلگنینی ایتدی.
او کابلده فعالیت یوریتهیاتگن خارجي اېلچیلر بیلن اوچرهشووده طالباننینگ پاکستانگه قرشی هجوملرینی «دفاعی» دېب تعریفلب، هجوملر اساسن پاکستاننینگ حربي مرکزلریگه قرهتیلگنینی بیلدیردی.
متقی شونینگدېک پاکستاننی اۉت آچیشنی تۉختهتیش کېلیشووینی بوزیشده عیبلب، پاکستان اوردوسی ایکّی تامان سعودی واسطهچیلیگیده مذاکره آلیب بارهیاتگن پیتده افغانستانگه هجوم قیلگنینی تأکیدلهدی.
او پاکستان اۉز هجوملرینی آقلش اوچون تحریک طالبان پاکستان (تیتیپی) مسألهسینی کۉترهیاتگنینی ایتیب، بو معما طالبان ینه حاکمیتگه کېلگندن کېین پیدا بۉلمهگنینی، بلکه ییللر دوامیده موجود بۉلگنینی تأکیدلهدی.
متقینینگ ادعا قیلیشیچه، پاکستان جنراللری اۉز مملکتیدهگی خوفسیزلیک معمالرینی حل قیلیش اۉرنیگه بوتون منطقهنی تهدید آستیگه قۉیماقده.
طالبان و پاکستان اۉرتهسیدهگی جنگلر بیر هفتهدن آرتیق وقت دوام اېتماقده. ماجرا طالبان نینگ پاکستان چېگره پُستهلریگه جواب هجوملری بیلن باشلنگن.
طالبان هجوملریدن آلدین پاکستان پکتیکا و ننگرهار ولایتلریدهگی نشانلرگه هوا هجوملری اویوشتیرگن اېدی. طالبان بو هجوملرنی افغانستان حاکمیتینینگ بوزیلیشی دېب بهالب، ننگرهاردخ۱۷ کیشی، جملهدن۱۱باله هلاک بۉلگنینی معلوم قیلگن.
بو هجوملرگه جوابن پاکستان اوردوسی « غضباللحق» ناملی حربي عملیاتنی باشلهدی و حاضرگچه افغانستاننینگ تورلی ولایتلریگه هوا و راکت هجوملری اویوشتیردی.
طالبان هم پاکستاننینگ چېگره پُستهلریگه هجوملرنی دوام اېتتیرماقده و گروه پاکستانگه قرشی بیر نېچته هوا هجوملری عملگه آشیریلگنینی معلوم قیلگن.
بیرلشگن ملتلر تشکیلاتی معلوماتلریگه کۉره، پاکستاننینگ افغانستانگه هجوملری عاقبتیده حاضرگچه۱۸۵نفر تینچ اهالی هلاک بۉلگن یاکه جراحتلنگن،۲۰مینگگه یقین عایله اېسه اۉز اویینی ترک اېتیشگه مجبور بۉلگن.
