۸-مارچ خلقارا خاتین-قیزلر کونی مناسبتی بیلن استانبول شهریده تدبیر اۉتکزیلدی. اوشبو دستور تورکستان اېللری اوقوو، کلتور و یاردملشمه اویوشمهسی تامانیدن تشکیل اېتیلدی.
تدبیرده استانبولده استقامت قیلهیاتگن افغانستان، عراق، آذربایجان، سوريه و شرقي تورکستانلیک مهاجرلر اشتراک اېتدیلر.
دستلب جمعیتنینگ عیاللر بۉلیمی رهبری هواجان سید مهمانلرنی قوتلب، خلقارا خاتین-قیزلر کونی نینگ تاریخی و اهمیتی همده عیاللرنینگ اۉز حقوقلری یۉلیده آلیب بارگن تینیمسیز کورهشلری حقیده سۉز یوریتدی. او، شونینگدېک، افغانستاندهگی عیاللرنینگ آغیر احوالی حقیده افسوس بیلدیردی.
اونینگ تأکیدلشیچه، بوگونگی تکنالوژي و ترقیات دوریده هم افغانستان عیاللری کۉپلب اساسي حقوقلریدن محروم بۉلیب، حتا تعلیم آلیش حقوقیدن هم چېتلهتیلگن.
هواجان سید دنیا جماعهچیلیگی و عیاللر حقوقلرینی حمایه قیلووچی تشکیلاتلردن افغانستان عیاللرینینگ آغیر احوالیگه جدّي اعتبار قرهتیشگه چقیردی.
شوندن سۉنگ گُلشیرین بېگلر، تورکمن عیاللری جمعیتی رهبری همده عراق تورکمنلری جمعیتینینگ عیاللر بۉلیمی رهبری سۉزگه چیقیب، اسلامده عیاللرنینگ اۉرنی و تاریخدهگی جسور عیاللرنینگ کورهشلری حقیده گپیردیلر. اولر اَیریم مملکتلرده هنوز عیاللر اۉز حقوقلریدن محروم حالده یشهیاتگنینی دن افسوس بیلدیردیلر.
تدبیر دوامیده خاتین-قیزلر کونی مناسبتی بیلن شعرلر اۉقیلدی. شونینگدېک، عیاللر رمزي طرزده دایره چهلیب، افغانستان عیاللری بیلن بیردملیکلرینی بیلدیردیلر.
دستور یکونیده فعال عیاللرگه ساوغهلر تاپشیریلدی همده تاریخدهگی کورهشچی عیاللر نامیگه بغیشلب کیک کېسیلدی.
خلقارا خاتین-قیزلر کونی نشانلنهیاتگن بیر پیتده افغانستانده عیاللر هلی هم تعلیم، اۉقیش و ایشلش حقوقلریدن محروم اېتیلیب، یمان وضعیت ده حیات کیچیرماقدهلر.
