طالبلر سۉزلاوچیسینینگ اۉرینباسری حمدالله فطرت پاکستان سۉنگگی۲۴ ساعت ایچیده پکتیا، پکتیکا، خوست و کنر ولایتلریگه هجوملرنی دوام اېتتیرگنینی ایتدی.
او بوگون (شنبه،۱۶ حوت) اعلان قیلگن بیاناتیده اوشبو هجوملرده تۉرت نفر تینچ اهالی هلاک بۉلگنی و ینه اوچ کیشی یرهلنگنی، شونینگدېک بیر نېچته اوی ویران بۉلگنینی بیلدیرگن.
طالبان مطبوعات سۉزلاوچیسی اۉرینباسری نینگ ایتیشیچه، پاکستان دندپتان و چمکنی تومنلریده تینچ اهالی نینگ اویلری و بازارلرینی نشانگه آلگن. نتیجهده بیر کیشی هلاک بۉلگن و ینه بیر کیشی یرهلنگن.
اونینگ قۉشیمچه قیلیشیچه، بو ایکّی تومنده۱۰ته اوی،۱۴ ته دکان، ایکّی ته سودا مرکزی و بیر مسجد ویران قیلینگن.
شونینگدېک، او پاکستان شگین و برمل تومنلریده هم قیشلاقلر و بازارلرگه اۉت آچگنینی ایتدی. بو هجوملرده شگین تومنی بازاریده ایکّی نفر تینچ اهالی هلاک بۉلگن و هر ایکّی تومنده آلتی ته اوی همده بیر نېچته دکان ویران قیلینگن.
اونینگ قۉشیمچه قیلیشیچه، پاکستان اوردوسینینگ بامباردمانی نتیجهسیده علیشېر تومنلریده هم بیر کیشی هلاک بۉلگن و ینه ایکّی کیشی یرهلنگن.
طالبان مطبوعات سۉزلاوچیسی اۉرینباسرینینگ سۉزلریگه کۉره، بو ایکّی تومنده۱۰ ته اوی و بیر مسجد ضرر کۉرگن همده ۱۰۰دن آرتیق عایله کۉچیشگه مجبور بۉلگن.
او ینه زازی میدان تومنیده هم بیر اوی هجومگه اوچرهگنینی ایتدی؛ بو هجومده قربانلر بۉلمهگن، اما اوی ویران قیلینگن.
شونینگدېک، او پاکستان سۉنگگی۲۴ساعت ایچیده ناری تامان 60 ته راکت آتگنینی دعوا قیلگن.
اونینگ ایتیشیچه، بو هجوملرده قربانلر بۉلمهگن، بیراق مادّي ضرر یېتکزیلگن و جملهدن بیر سوو تۉغانی هم ویران قیلینگن.
طالبان و پاکستان اۉرتهسیدهگی اوروش بیر هفتهدن آرتیق دوام اېتماقده. شو وقت ایچیده پاکستان افغانستاننینگ تورلی ولایتلریگه هوا و راکت هجوملرینی اویوشتیرگن.
بیرلشگن ملتلر تشکیلاتی یاردم ادارهسینینگ معلوماتلریگه کۉره، پاکستاننینگ افغانستانگه قیلگن هجوملری نتیجهسیده حاضرگچه ۱۸۵نفر تینچ اهالی هلاک بۉلگن یاکه یرهلنگن، مینگلب عایلهلر اېسه کۉچیشگه مجبور بۉلگن.
