طالبلر تشقی ایشلر وزیری امیرخان متقی تیلفون آرقهلی قطر دولتینینگ تشقی ایشلر بۉییچه دولت وزیری محمد بن عبدالعزیز آل خلیفه بیلن صحبتلشیب، ایران نامینی تیلگه آلمهسدن اوروشنینگ فارس کۉرفزی مملکتلریگه کېنگهییشینی قارهلهدی.
طالبان تشقی ایشلر وزیرلیگی بیاناتیگه کۉره، بوگون (جمعه، ۱۵حوت) بۉلیب اۉتگن اوشبو صحبتده تامانلر طالبان و پاکستان اۉرتهسیدهگی تۉقنهشوولر همده یقین شرقدهگی وضعیت حقیده فکر المشگن.
متقي منطقهدهگی وضعیتدن خواطر بیلدیرر اېکن، شوندهی دېگن: «پاکستاننینگ افغانستانگه تجاوزی بیلن بیرگه امریکا قۉشمه ایالتلری و اسرایلنینگ ایرانگه قیلگن هجومی آرتیدن اوروشنینگ فارس کۉرفزی دولتلریگه کېنگهییشی قارهلنهدی و او تۉختهتیلیشی کېرهک»
اونینگ ینه قۉشیمچه قیلیشیچه، طالبان «دولتلرنینگ ملي حاکمیتی، ملي خوفسیزلیگی و حدودي یخلیتلیگینی حرمت قیلیشنی مهم تمایل دېب بیلهدی همده معمالرنی حل قیلیشده زۉرآورلیکنی کوچهیتیریش اۉرنیگه دیپلوماتیکنی افضل کۉرهدی»
بیاناتگه کۉره، قطرلیک رسمي اېسه منطقه حاضر آغیر دورنی باشدن کېچیرهیاتگنینی ایتگن.
اونینگ سۉزلریگه کۉره، ایران قطر تامان بالیستیک راکتلر و درونلر اوچیرگن، اما اولرنینگ اکثریتی توتیب قالینگن.
محمد بن عبدالعزیز آل خلیفه «قطر تینچلیک مملکتی بۉلیب، دایما دنیادهگی ماجرالرنی تینچ یۉل بیلن حل قیلیش ضرورلیگینی تأکیدلب کېلهدی.»
طالبان تشقی ایشلر وزیرلیگینینگ معلوم قیلیشیچه، صحبت یکونیده تامانلر دیپلوماتيک یۉلینی تنلش و معمالرنی مذاکره آرقهلی حل قیلیش ضرورلیگینی تأکیدلهگن.
ایرانگه امریکا قۉشمه ایالتلری و اسرایل هجوم قیلگنیدن سۉنگ، ایران منطقهدهگی امریکا حربي بازهلرینی، جملهدن قطردهگی بازهلرنی بیر نېچه بار راکت و درونلر بیلن نشانگه آلگن.
اوّلراق هم طالبان منطقهدهگی ماجرالر کېنگهییشیدن خواطر بیلدیریب، کېسکینلیکلرنی مذاکره و ملاقات آرقهلی حل قیلیشگه چقیرگن اېدی.
