افغانستانده بیرلشگن ملتلر تشکیلاتینینگ یاردم ادارهسی (یوناما)نینگ معلوم قیلیشیچه، پاکستاننینگ افغانستانگه قیلگن هجوملری نتیجهسیده، طالبلر بیلن ماجرا باشلنگنیدن بویان تینچ اهالی تلفاتی سانی۵۶ نفر هلاک بۉلگن و۱۲۹ نفر یرهلنگن.
یوناما بوگون (جمعه، ۱۵-حوت) اعلان قیلگن بیاناتیده تلفاتلرنینگ 55 فایزینی عیاللر و بالهلر تشکیل اېتیشینی بیلدیرگن.
اوّلراق یوناما قربانلر سانینی۴۲ کیشی هلاک بۉلگن و۱۰۴کیشی یرهلنگن دېب اعلان قیلگن اېدی.
بیاناتگه کۉره، پاکستان نینگ ۲۷فبروری کونی پکتیکا ولایتینینگ برمل اولسواللیگیده عملگه آشیرگن هجوملریدن بیریده۱۴ نفر تینچ اهالی، جملهدن تۉرت عیال، ایکّی قیز، بېش اۉغیل باله و اوچ اېرکک هلاک بۉلگن. ینه آلتی کیشی ایکّی عیال، بیر قیز، ایکّی اۉغیل باله و بیر اېرکک جراحت آلگن.
یونامانینگ تأکیدلشیچه، طالبان و پاکستان اۉرتهسیدهگی حاضرگی تۉقنهشووده تینچ اهالی قربانلری ۲۰۲۵ییل اکتوبر آییده ایکّی تامان اۉرتهسیده یوز بېرگن ماجرا بیلن سالیشتیرگنده کۉپراق بۉلگن.
اۉشه پیتده ۱۰-۱۷ اکتوبر کونلری دوام اېتگن تۉقنهشوولرده۴۷ نفر تینچ اهالی هلاک بۉلگنینی و۴۵۶ کیشی یرهلنگنینی معلوم قیلگن اېدی.
شونینگدېک، یوناما ۲۰۲۵-ییل نینگ آخرگی آیلریده هم طالبان و پاکستان اۉرتهسیدهگی چېگره تۉقنهشوولریده کمیده۷۰ نفر تینچ اهالی هلاک بۉلگنینی و ینه۴۷۸کیشی یرهلنگنینی حجتلشتیرگنینی بیلدیرگن.
یوناما بیاناتیگه کۉره، جاري ییل نینگ 1-جنوریسیدن۲۲فبروریگچه هم پاکستان نینگ ننگرهار ولایتیگه قیلگن هوا و راکت هجوملری نتیجهسیده کمیده۱۳ نفر تینچ اهالی هلاک بۉلگن و۱۲ کیشی یرهلنگن.
یوناما ماجرا طرفلریدن «تېگیشلی پروتکوللرگه عمل قیلیب، تینچ اهالیگه ضرر یېتکزمسلیک و خلق ارا قانونلرگه موافق اولرنی حمایه قیلیش بۉییچه اۉز مجبوريتلرینی بجریش»نی سۉرهدی.
طالبان و پاکستان اۉرتهسیدهگی تۉقنهشوولر اۉتگن هفته پنجشنبه کېچهسی باشلنگن بۉلیب، حاضر ایکّینچی هفتهگه کیرگن.
بو ماجرا طالباننینگ پاکستان چېگره پُستهلریگه قیلگن جواب هجوملریدن کېین باشلنگن و حاضرگچه دوام اېتماقده.
پاکستاننینگ پکتیکا ولایتی و ننگرهار ولایتی حدودلریگه اویوشتیرگن هوا هجوملریدن سۉنگ طالبان هم جواب ضربهلری بېرگن.
ماجرا باشلنگنیدن بېری پاکستان بیر نېچه ولایتدهگی تورلی حدود و نشانلرگه هوا همده راکت هجوملری اویوشتیریب، تینچ اهالی آرهسیده کتّه تلفاتلرگه سبب بۉلگن.
