امریکا و اسرایلنینگ ایران بیلن اوروشی تۉرتینچی کونیگه کیرر اېکن، اۉتگن تون دوامیده ایکّی تاماننینگ هجوملری کېسکین دوام اېتگن و تورلی بۉلیملر نشانگه آلینگن.
سعوديه عربستانی مدافعه وزیرلیگینینگ معلوم قیلیشیچه، بوگون تانگده (سهشنبه،۱۲ حوت) اوشبو مملکت پایتختی ریاضدهگی امریکا اېلچیلیگی ایران تامانیدن هجومگه اوچرهگن و بناده یانغین یوزهگه کېلگن.
وزیرلیکنینگ تصدیقلشیچه، ایکّی درون ریاضدهگی امریکا اېلچیخانهسیگه اوریلگن.
رویترس اخبارات آژانسی هم ریاضدهگی بیر نېچه پارتلش آوازلری اېشیتیلگنی آرتیدن امریکا اېلچیخانهسی بناسینینگ بیر قِسمی یانیب کېتگنینی خبر قیلگن.
ایراننینگ تونگی هجوملری اسرایل شهرلری و منطقهنینگ باشقه دولتلری، جملهدن قطر و بحرینگه هم دوام اېتگن.
شو بیلن بیرگه، ایرانگه یقین قوراللی گروهلر عراقده هم امریکانینگ اربیلدهگی قرارگاهسی نشانگه آلگنی خبر قیلینگن.
امریکا و اسرایل نینگ ایرانگه قرشی هجوملری هم کېسکین دوام اېتگن بۉلیب، مملکتنینگ تورلی شهرلریدهگی بنا ضربهگه اوچرهگن.
دولت تلویزیونی اۉزینینگ تلگرام صحیفهسیده حدودیده ایکّی پارتلش یوز بېرگنی و جایدن توتون کۉتریلگنینی یازگن.
شونگه قرهمهی، تلویزیون رهبری بو حادثه ایش جریانیگه تأثیر کۉرستمهگنینی و تلفاتلر یۉقلیگینی بیلدیرگن.
تیناون آقشام باشیده هم دولت تلویزیونی بنالریدن بیری هجومگه اوچرهگن اېدی.
اوروش تۉرتینچی کونیگه کیریب، هجوملر کوچهیگنی سری ماجرانینگ تېز سرعتلرده منطقوي اوروشگه ایلنیشی حقیدهگی خواطرلر آرتیب بارماقده.
جهان بازارلری هم اوشبو اوروش تأثیریده قالگن، سهام نرخی پسهیگن، نفت و گاز نرخلری اېسه دنیانینگ تورلی مملکتلریده، جملهدن اروپاده آشگن.
