طالبلر تشقی ایشلر وزیرلیگینینگ خبر بېریشیچه، امیرخان متقی تیلفون آرقهلی ایران تشقی ایشلر وزیری عباس عراقچی بیلن سۉنگگی واقعهلر و منطقهدهگی حالت یوزهسیدن فکر المشگن.
وزیرلیک بوگون (دوشنبه، ۱۱ حوت) اعلان قیلگن بیاناتده یازیشیچه، متقی «امریکا و اسرایلنینگ ایران اسلامي جمهوریتیگه قرشی تجاوزینی قارهلب، ایران انقلابي رهبری نشانگه آلینگن واقعهگه مناسبت بیلدیرگن حالده حکومت و خلقگه تعزیه و همدردلیک اظهار قیلگن»
بیاناتگه کۉره، عراقچی «طالباننینگ همدردلیک اظهارینی قدرلب، مملکتی نقطهی نظری و ایراننینگ عملدهگی تجاوزگه قرشی چارهلری حقیده توشونتیریش بېرگن»
طالبان تشقی ایشلر وزیرلیگی خبریده متقی شونینگدېک، «طالبان ملي حاکمیت، حدودي یخلیتلیک و دولتلرنینگ چېگرهلرینی بوزیشنی رد اېتهدی و بونی خلق ارا قبول قیلینگن تمایللرگه ضد دېب حسابلهیدی» دېب تأکیدلهگن.
بیاناتده ایتیلیشیچه، متقی شونینگدېک، ضدیتلرنینگ درحال تۉختهتیلیشی و تینچ یۉل بیلن حل قیلیش اوچون دیپلوماتیک کاناللرگه مراجعت قیلیش ضرورلیگینی تأکیدلهگن.
طالبان تشقی ایشلر وزیرلیگی ایلگری هم، ایران رهبرینینگ اۉلدیریلیشی حقیده آچیق ایتمسدن، منطقهدهگی کېسکینلیک آشیشیدن خواطر بیلدیرگن اېدی.
سۉنگگی تۉرت ییل دوامیده طالبان و ایران سیاسي و اقتصادي علاقهلرنی رواجلنتیرگن، اما طالبان ایران و فارس کۉرفزی دولتلری اۉرتهسیدهگی ضدیتلرده احتیاطکار موضوع توتهدی.
